മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി; മോദിയുടെയും അമിത്ഷായുടെയും വീടുകളുടെ മുന്നിലേക്ക് സമരം വ്യാപിപിക്കാന്‍ ഇന്ത്യ സഖ്യം
ന്യൂഡല്‍ഹി: മോദിയുടെയും അമിത്ഷായുടെയും വീടുകളുടെ മുന്നിലേക്ക് സമരം വ്യാപിപിക്കാന്‍ ഇന്ത്യ സഖ്യം. മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനും പ്രത്യേക തീവ്ര വോട്ടര്‍പട്ടിക പരിഷ്‌ക്കരണത്തിനും എതിരായി പ്രതിഷേധം കടുപ്പിക്കാന്‍ ഇവർ ഒരുങ്ങുകയാണ്. സേവാ തീര്‍ത്ഥ്, രാഷ്ട്രപതി ഭവന്‍, ഉപരാഷ്ട്രപതിയുടെ വീടും സമരവേദിയാക്കാന്‍ സഖ്യം ആലോചിക്കുന്നുണ്ട്.
രാഹുല്‍ ഗാന്ധി, പ്രിയങ്ക ഗാന്ധി തുടങ്ങിയ നേതാക്കളെ പ്രതിഷേധത്തിനിടെ പോലീസ് കസ്റ്റഡിയില്‍ എടുക്കുകയും ബലംപ്രയോഗിച്ച് നീക്കം ചെയ്യുകയും ചെയ്തതിന് പിന്നാലെയാണ് സമരം ശക്തമാക്കാന്‍ ഇന്ത്യ സഖ്യത്തില്‍ ധാരണയായത്. ഇത് ചര്‍ച്ച ചെയ്യാന്‍ ഇന്ത്യ സഖ്യം എംപിമാരുടെ യോഗം വെള്ളിയാഴ്ച്ച ചേരും. രാഹുല്‍ ഗാന്ധി നേതൃത്വം നല്‍കുന്ന യോഗത്തില്‍ ഗ്യാനേഷ് കുമാറിനെ താഴെയിറക്കുന്നതിനുള്ള പുതിയ സമരരീതിയുടെ പ്രഖ്യാപനവും പ്രതീക്ഷിക്കുന്നുണ്ട്.
ഇന്ത്യ സഖ്യം രാഷ്ട്രപതി ദ്രൗപതി മുര്‍മുവിനെ കാണാന്‍ അനുമതി ലഭിച്ചില്ലെങ്കില്‍ തുടര്‍നടപടികള്‍ കൂടിയാലോചിക്കുമെന്നും റിപ്പോര്‍ട്ടുകള്‍ ഉണ്ട്. രാഷ്ട്രപതിയെ കാണാനായി ഒക്ടോബര്‍ 2ന് അനുമതി തേടിയിരുന്നു എന്നും ആരൊക്കെയാണ് യോഗത്തിന് വരുന്നതെന്ന് അറിയിക്കാനായി രാഷ്ട്രപതി ഭവന്‍ ആവശ്യപ്പെട്ടിരുന്നു എന്നും കോണ്‍ഗ്രസ് ജനറല്‍ സെക്രട്ടറി കെ സി വേണുഗോപാല്‍ പറഞ്ഞു. പിന്നീട് ഒക്ടോബര്‍ 5ന് പങ്കെടുക്കുന്നവരുടെ പേരുകള്‍ നല്‍കിയെങ്കിലും രാഷ്ട്രപതിഭവനില്‍ നിന്ന് പിന്നീട് ഒരു പ്രതികരണവും ഉണ്ടായില്ല.
റാലികളും ജനാധിപത്യ സംരക്ഷണ മാര്‍ച്ചുകളും ഉള്‍പ്പെടെ എസ്‌ഐആര്‍ തര്‍ക്കത്തില്‍ സംയുക്ത കര്‍മ്മപദ്ധതിക്ക് ഇന്ത്യ സഖ്യം രൂപം നേരത്തെ രൂപം നല്‍കിയിരുന്നു. നരേന്ദ്രമോദി, അമിത്ഷാ, ഗ്യാനേഷ്‌കുമാര്‍ എന്നിവര്‍ ചേര്‍ന്ന് വോട്ട് ചോരി എന്ന ക്രിമിനല്‍ ഗൂഢാലോചനയിലൂടെ രാജ്യം കൈക്കലാക്കാന്‍ ശ്രമിക്കുകയാണെന്ന് ആരോപിച്ച് ഇന്ത്യ സഖ്യം നേതാക്കള്‍ വ്യാഴാഴ്ച്ച രാജ്ഘട്ടിലെ മഹാത്മാഗാന്ധി സ്മാരകത്തില്‍ ധര്‍ണ്ണയും നടത്തി.മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ കോക്രോച് ജനത പാർടി ഇടത് വിദ്യാർത്ഥി സംഘടനകളുമായി ചേർന്ന് നാളെ നടത്തുന്ന പ്രതിഷേധത്തിന്റെ പശ്ചാത്തലത്തിൽ ഡൽഹിയിലെ പ്രധാന മെട്രോ സ്റ്റേഷനുകൾ അടക്കും.
വെള്ളിയാഴ്ച രാത്രി 9 മണി മുതൽ മെട്രോ സ്റ്റേഷനുകൾ അടച്ചിടുമെന്ന് ഡൽഹി മെട്രോ റെയിൽ കോർപ്പറേഷൻ അറിയിച്ചു. തലസ്ഥാന നഗരിയിലെ ക്രമസമാധാന നില ഉറപ്പാക്കുന്നതിനും വൻതോതിൽ ആളുകൾ തടിച്ചുകൂടുന്നത് തടയുന്നതിനുമാണ് പോലീസിന്റെ നിർദ്ദേശപ്രകാരം ഈ തീരുമാനമെടുത്തത്.
