ഫോണ്പേയും ഗൂഗിള് പേയും വഴി ഇനി പിഎഫ് പണവും എടുക്കാം; പണം കൈയ്യിലെത്താൻ ചെയ്യേണ്ടത് ഇത്
എംപ്ലോയീസ് പ്രൊവിഡന്റ് ഫണ്ട് (EPFO) വരിക്കാർക്ക് തങ്ങളുടെ അടിയന്തര ആവശ്യങ്ങള്ക്കായി പിഎഫ് പണം പിൻവലിക്കുന്നത് ഇനി കൂടുതല് എളുപ്പമാകും.ഗൂഗിള് പേ, ഫോണ്പേ പോലെയുള്ള യുപിഐ (UPI) സംവിധാനങ്ങള് വഴി പിഎഫ് അക്കൗണ്ടില് നിന്നും പണം നേരിട്ട് ബാങ്ക് അക്കൗണ്ടിലേക്ക് മാറ്റാനുള്ള പുതിയ ഫെസിലിറ്റിയുടെ പരീക്ഷണങ്ങള് സർക്കാർ വിജയകരമായി പൂർത്തിയാക്കി. കേന്ദ്ര തൊഴില് മന്ത്രി മൻസുഖ് മാണ്ഡവ്യയാണ് വരിക്കാർക്ക് വലിയ ആശ്വാസം നല്കുന്ന ഈ പുതിയ ഡിജിറ്റല് പരിഷ്കാരം ഔദ്യോഗികമായി പ്രഖ്യാപിച്ചത്. കനത്ത താമസം നേരിടുന്ന നിലവിലെ ക്ലെയിം സെറ്റില്മെന്റ് രീതികള്ക്ക് പകരമായാണ് ഈ തല്ക്ഷണ സംവിധാനം വരുന്നത്.
യുപിഐ വഴി എങ്ങനെ പണം പിൻവലിക്കാം?
പുതിയ സംവിധാനം നിലവില് വരുന്നതോടെ വരിക്കാർക്ക് തങ്ങളുടെ ഇപിഎഫ്ഒ പോർട്ടലിലോ നിശ്ചിത പ്ലാറ്റ്ഫോമിലോ ലോഗിൻ ചെയ്ത് പിൻവലിക്കാൻ ലഭ്യമായ തുക എത്രയെന്ന് പരിശോധിക്കാൻ സാധിക്കും. തുടർന്ന് ഈ തുക തങ്ങളുടെ ലിങ്ക് ചെയ്ത ബാങ്ക് അക്കൗണ്ടിലേക്ക് ട്രാൻസ്ഫർ ചെയ്യാൻ യുപിഐ ഓപ്ഷൻ തിരഞ്ഞെടുക്കാം. പണമിടപാട് പൂർണ്ണമായും സുരക്ഷിതമാക്കാൻ ഉപഭോക്താക്കള് തങ്ങളുടെ രഹസ്യ യുപിഐ പിൻ (UPI PIN) ടൈപ്പ് ചെയ്ത് ആധികാരികത ഉറപ്പാക്കേണ്ടതുണ്ട്.
തൊഴില് മന്ത്രാലയത്തിന്റെ പുതിയ മോഡല് അനുസരിച്ച്, വരിക്കാരന്റെ ആകെ പിഎഫ് ബാലൻസിന്റെ ഒരു നിശ്ചിത ഭാഗം നിലവിലെ നിയമപ്രകാരം ലോക്ക് ആയി തുടരും. എന്നാല് അടിയന്തരമായി പിൻവലിക്കാൻ അർഹതയുള്ള ബാക്കി തുക യുപിഐ വഴി സെക്കന്റുകള്ക്കുള്ളില് സ്വന്തം അക്കൗണ്ടിലേക്ക് മാറ്റാൻ സാധിക്കും. ബാങ്കിലെത്തുന്ന പണം വരിക്കാർക്ക് ഉടൻ തന്നെ ഡിജിറ്റല് പേയ്മെന്റുകള്ക്കോ എടിഎം വഴി പിൻവലിക്കാനോ ഉപയോഗിക്കാം. നിലവില് ഇതിന്റെ കൃത്യമായ പരിധി ഇപിഎഫ്ഒ പ്രഖ്യാപിച്ചിട്ടില്ലെങ്കിലും, അർഹതയുള്ള തുകയുടെ 75% വരെ ഇത്തരത്തില് തല്ക്ഷണം പിൻവലിക്കാൻ അനുമതിയുണ്ടാകുമെന്നാണ് സൂചനകള്.
ഇപിഎഫ്ഒ ഇനി വാട്സാപ്പിലും; 24 മണിക്കൂറും സേവനം
യുപിഐ പണമിടപാടിന് പുറമെ സാധാരണക്കാരായ തൊഴിലാളികളിലേക്ക് കൂടുതല് എളുപ്പത്തില് ഇറങ്ങിച്ചെല്ലാൻ വാട്സാപ്പ് വഴിയുള്ള സേവനങ്ങളും ഇപിഎഫ്ഒ അടുത്ത ഒരു മാസത്തിനുള്ളില് ആരംഭിക്കും. ഇപിഎഫ്ഒയുടെ ഗ്രീൻ ടിക്ക് ഉള്ള ഒഫീഷ്യല് വാട്സാപ്പ് നമ്പറിലേക്ക് ‘Hello’ എന്ന് മെസ്സേജ് അയച്ചുകൊണ്ട് വരിക്കാർക്ക് ഈ സേവനം ഉപയോഗപ്പെടുത്താം.
പ്രാദേശിക ഭാഷകളില് ലഭ്യമാകുന്ന ഈ വാട്സാപ്പ് ചാറ്റ് സംവിധാനത്തിലൂടെ പിഎഫ് ബാലൻസ് അറിയാനും സംശയങ്ങള് തീർക്കാനും സാധിക്കും. പ്രധാനമന്ത്രി വികസിത് ഭാരത് റോസ്ഗാർ യോജന (PMVBRY) ഗുണഭോക്താക്കള് നേരിടുന്ന ആധാർ ഒഥന്റിക്കേഷൻ പ്രശ്നങ്ങള് പരിഹരിക്കാനും, ഫേസ് ഒഥന്റിക്കേഷൻ സാങ്കേതികവിദ്യ വഴി ബാങ്ക് അക്കൗണ്ടുകള് വെരിഫൈ ചെയ്യാനും ഈ വാട്സാപ്പ് ഹെല്പ്പ്ലൈൻ വലിയ രീതിയില് സഹായിക്കും.
നിലവില് ഓണ്ലൈനായി ക്ലെയിം ഫോം സമർപ്പിച്ചാല് ഓട്ടോ-സെറ്റില്മെന്റ് വഴി പണം ബാങ്കിലെത്താൻ സാധാരണയായി മൂന്ന് ദിവസത്തോളം സമയമെടുക്കാറുണ്ട്. അടുത്തിടെ സർക്കാർ ഈ ഓട്ടോ-സെറ്റില്മെന്റ് പരിധി 1 ലക്ഷം രൂപയില് നിന്നും 5 ലക്ഷം രൂപയായി ഉയർത്തിയിരുന്നു. എന്നാല് യുപിഐ സംവിധാനം കൂടി എത്തുന്നതോടെ അടിയന്തര മെഡിക്കല് ആവശ്യങ്ങള്ക്കും വിവാഹം, വിദ്യാഭ്യാസം എന്നിവയ്ക്കും മിനിറ്റുകള്ക്കുള്ളില് പണം ലഭ്യമാകും എന്നത് സാധാരണക്കാരായ ലക്ഷക്കണക്കിന് ശമ്പളക്കാർക്ക് വലിയ അനുഗ്രഹമായി മാറും.
