ഒപ്പിന് കുപ്പി നിര്‍ബന്ധം!! ലക്ഷങ്ങള്‍ വിലവരുന്ന 74 കുപ്പി മദ്യം, അക്കൗണ്ടില്‍ 84 ലക്ഷം; ജേഴ്സണ്‍ എന്ന ജഗജില്ലി ആ‍ര്‍ടിഒയില്‍ നിന്നും കണ്ടെത്തിയത്
കൊച്ചി: കൈക്കൂലി കേസില്‍ അറസ്റ്റിലായ എറണാകുളം ആർടിഒ ടി. എം. ജേഴ്സണില്‍ നിന്നും പിടിച്ചെടുത്തത് 74 കുപ്പി മദ്യം. കൈക്കൂലിയായി കൈപ്പറ്റിയ മദ്യമാണ് വീട്ടില്‍ നിന്നും വിജിലൻസ് സംഘം കണ്ടെടുത്തത്. ലക്ഷക്കണക്കിനു രൂപ വില വരുന്ന കുപ്പികളും കൂട്ടത്തിലുണ്ട്. അപേക്ഷ തീർപ്പാക്കാൻ പണത്തൊടൊപ്പം മദ്യവും ഇയാള്‍ ചോദിച്ചു വാങ്ങിയിരുന്നു.
വരവില്‍ കവിഞ്ഞ സ്വത്തുസമ്ബാദനമടക്കമുള്ള കാര്യങ്ങളും വിജിലൻസ് അന്വേഷിക്കുന്നുണ്ട്. ജേഴ്സണിന്റെയും കുടുംബത്തിന്റെയും വിവിധ അക്കൗണ്ടുകളില്‍ നിന്നും 84 ലക്ഷം രൂപയാണ് ഇതുവരെ കണ്ടെത്തിയത്. സംസ്ഥാനത്തിന്റെ വിവിധ ഭാഗങ്ങങ്ങളില്‍ ബിനാമി പേരില്‍ ഇയാള്‍ സ്വത്ത് വാങ്ങിക്കൂട്ടിയെന്ന സംശയവുമുണ്ട്.
ബുധനാഴ്ചയാണ് ജേഴ്സണെ വിജിലൻസ് അറസ്റ്റ് ചെയ്തത്. ചെല്ലാനം സ്വദേശി മാനേജറായ ബസിന്റെ റൂട്ട് പെർമിറ്റ് പുതുക്കി മറ്റൊരു ബസിലേക്ക് മാറ്റാൻ 25,000 രൂപയും കുപ്പിയുമാണ് ആവശ്യപ്പെട്ടത്. ഏജന്റുമാർ മുഖേന കൈക്കൂലി ആവശ്യപ്പെട്ട കാര്യം ചെല്ലാനം സ്വദേശി വിജിലൻസിനെ അറിയിക്കുകയായിരുന്നു. വിജിലൻസിന്റെ നിർദ്ദേശപ്രകാരം 5000 രൂപയും കുപ്പിയും നല്‍കി. തൊട്ടുപിന്നാലെ ജേഴ്സണേയും കൂട്ടാളികളേയും കസ്റ്റഡിയിലെടുക്കുകയായിരുന്നു. പ്രതികളെ ഇന്ന് വിജിലൻസ് കോടതിയില്‍ ഹാജരാക്കും
