ഗുരുവായൂരില് വന്തിരക്ക്; വിഷുക്കണി ദര്ശന സായൂജ്യത്തില് ആയിരങ്ങൾ
തൃശൂര് :വിഷുവിനോടനുബന്ധിച്ച് ഗുരുവായൂര് ക്ഷേത്രത്തില് വന്ഭക്തജനത്തിരക്ക്. പുലര്ച്ചെ 2.55 മുതല് 3.55 വരെയുള്ള സമയത്ത് ആയിരക്കണക്കിന് ഭക്തര് വിഷുക്കണി ദര്ശനം നടത്തി സായൂജ്യം നേടി. പതിനായിരക്കണക്കിന് ഭക്തര് ഇന്ന് ദര്ശനത്തിനായി ഗുരുവായൂരില് എത്തുമെന്നാണ് പ്രതീക്ഷിക്കുന്നത്. തിരക്ക് നിയന്ത്രിക്കാന് വിപുലമായ സജ്ജീകരണങ്ങളാണ് ദേവസ്വം ഏര്പ്പെടുത്തിയിരിക്കുന്നത്.
ഗുരുവായൂര് ക്ഷേത്രത്തില് എത്തുന്ന ഭക്തര്ക്കായി വിപുലമായ ദര്ശന ക്രമീകരണങ്ങളാണ് ഏര്പ്പെടുത്തിയിരിക്കുന്നത്. തിരക്ക് നിയന്ത്രിക്കുന്നതിന്റെ ഭാഗമായി പൊതുവരിയില് നില്ക്കുന്ന ഭക്തര്ക്കായിരിക്കും ദര്ശനത്തിന് മുന്ഗണന നല്കുക. മുതിര്ന്ന പൗരന്മാര്ക്കും പ്രാദേശിക വിഭാഗത്തില്പ്പെട്ടവര്ക്കും തിരക്ക് കണക്കിലെടുത്ത് ആദ്യമെത്തുന്ന 500 പേര്ക്ക് വീതം ടോക്കണ് നല്കി ദര്ശനം പരിമിതപ്പെടുത്തിയിട്ടുണ്ട്.
