സംസ്ഥാനത്ത് ഏകീകൃത ദേവസ്വം നിയമം നടപ്പാക്കണം- എം.കെ. രാഘവൻ എംപി
വളാഞ്ചേരി : കേരളത്തിൽ ഏകീകൃത ദേവസ്വം നിയമം കൊണ്ടുവരണമെന്ന് എം.കെ. രാഘവൻ എംപി. കാടാമ്പുഴ ഭഗവതീക്ഷേത്രത്തിൽനിന്ന് വിരമിക്കുന്ന സി.വി. ആനന്ദവല്ലിക്ക് മലബാർ ദേവസ്വം സ്റ്റാഫ് യൂണിയൻ ഐഎൻടിയുസി നൽകിയ യാത്രയയപ്പ് സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
സംസ്ഥാനത്തെ ക്ഷേത്രജീവനക്കാർ പല തട്ടിലായതിനാൽ അവരുടെ വേതനവും നാമമാത്രമാണ്. അവർക്ക് ശമ്പളം കുടിശ്ശികയാകുന്ന അവസ്ഥയുണ്ട്. പിരിഞ്ഞുപോകുന്ന ജീവനക്കാർക്ക് നാമമാത്രമായ ക്ഷേമനിധി പെൻഷനാണ് ലഭിക്കുന്നത്. ആനുകൂല്യങ്ങളും പരിമിതമാണ്- എം.കെ. രാഘവൻ എംപി പറഞ്ഞു.
ജില്ലാ പ്രസിഡന്റ് വി. മധുസൂദനൻ അധ്യക്ഷത വഹിച്ചു. കാടാമ്പുഴ ക്ഷേത്രത്തിലെ ശാന്തി സുബിൻ എമ്പ്രാന്തിരി ദീപം തെളിച്ചു. പി. ഇഫ്തിഖാറുദ്ദീൻ, ഉമറലി കരേക്കാട്, വി.കെ. ഷഫീഖ്, കെ.പി. സുരേന്ദ്രൻ, വിനു പുല്ലാനൂർ, ഒ.കെ. സുബൈർ, കാടാമ്പുഴ മോഹനൻ, സജിത നന്നേങ്ങാടൻ, ഇ.കെ. ബാബു, സൂപ്രണ്ട് മീരാ ഭാസ്‌കരൻ തുടങ്ങിയവർ പ്രസംഗിച്ചു. പ്രവേശനപരീക്ഷകളിൽ ഉന്നതവിജയം നേടിയവരെയും കലാകാരന്മാരെയും അനുമോദിച്ചു.
