KERALA
സ്വര്ണ വിലയില് വര്ധന തുടരുന്നു: പവന് 66,480 രൂപയായി
സ്വർണ വിലയില് കുതിപ്പ് തുടരുന്നു. വ്യാഴാഴ്ച പവന്റെ വില 160 രൂപ കൂടി 66,480 രൂപയായി. 8,310 രൂപയാണ് ഗ്രാമിന്.20 ദിവസത്തിനിടെ പവന്റെ വിലയില് 2,960 രൂപയാണ് വർധിച്ചത്. മാർച്ച് ഒന്നിന് 63,520 രൂപയായിരുന്നു പവന്റെ വില.
യുഎസ് കേന്ദ്ര ബാങ്കായ ഫെഡ് റിസർവ് ഇത്തവണ നിരക്കില് മാറ്റംവരുത്തിയേക്കില്ലെന്ന് സൂചന നല്കിയതാണ് സ്വർണം നേട്ടമാക്കിയത്. രാജ്യാന്തര ട്രോയ് ഔണ്സിന് 3,052 ഡോളർ നിലവാരത്തിലാണ് വ്യാപാരം നടന്നത്.
വില കുതിച്ചതോടെ ഒരു പവൻ സ്വർണാഭരണം ലഭിക്കാൻ 72,000 രൂപയെങ്കിലും നല്കേണ്ട സ്ഥിതിയാണ്. കുറഞ്ഞ പണിക്കൂലിയായ അഞ്ച് ശതമാനവും മൂന്ന് ശതമാനം ജിഎസ്ടിയും ഹാള്മാർക്കിങ് നിരക്കും ഉള്പ്പടെയാണിത്.
