കടുത്ത ചൂടിൽ ആശ്വാസമായി മാറഞ്ചേരി പഞ്ചായത്തിന്റെ സ്നേഹപാനീയം; ഓഫീസിലെത്തുന്നവർക്ക് ഇനി നാരങ്ങാവെള്ളവും സംഭാരവും
കടുത്ത ചൂടിൽ ആശ്വാസമായി മാറഞ്ചേരി പഞ്ചായത്തിന്റെ സ്നേഹപാനീയം; ഓഫീസിലെത്തുന്നവർക്ക് ഇനി നാരങ്ങാവെള്ളവും സംഭാരവും നാട് കടുത്ത വേനൽച്ചൂടിൽ വെന്തുരുകുമ്പോൾ, സേവനങ്ങൾക്കായി ഓഫീസിലെത്തുന്ന പൊതുജനങ്ങൾക്ക് കുളിർമയേകുന്ന കരുതൽ നടപടിയുമായി മാറഞ്ചേരി ഗ്രാമപഞ്ചായത്ത്. പഞ്ചായത്ത് ഓഫീസിൽ എത്തുന്ന നാട്ടുകാർക്ക് ചൂടിനെ പ്രതിരോധിക്കാൻ തണുത്ത നാരങ്ങാവെള്ളം നൽകിയാണ് അധികൃതർ മാതൃകയാകുന്നത്. വിവിധ ആവശ്യങ്ങൾക്കായി ദൂരസ്ഥലങ്ങളിൽ നിന്നും മറ്റും എത്തുന്നവർക്ക് ഈ വേനൽക്കാലത്ത് വലിയൊരു ആശ്വാസമാണ് പഞ്ചായത്തിന്റെ ഈ പുതിയ നീക്കം.
പഞ്ചായത്ത് ഓഫീസിനുള്ളിൽ സജ്ജീകരിച്ചിരിക്കുന്ന ഈ സൗകര്യം വരും ദിവസങ്ങളിലും തുടരുമെന്ന് അധികൃതർ അറിയിച്ചു. നാരങ്ങാവെള്ളത്തിന് പുറമെ ആരോഗ്യത്തിന് ഉത്തമമായ സംഭാരം അടക്കമുള്ള പാനീയങ്ങൾ വരും ദിവസങ്ങളിൽ ലഭ്യമാക്കാനാണ് ഭരണസമിതി ലക്ഷ്യമിടുന്നത്. ജനങ്ങളുടെ ആരോഗ്യം മുൻനിർത്തിയും നിർജ്ജലീകരണം തടയാനും ഇത്തരം ചെറിയ ഇടപെടലുകൾ വലിയ സഹായമാകുമെന്ന് പഞ്ചായത്ത് പ്രസിഡന്റ് ടി. ശ്രീജിത്ത് പറഞ്ഞു. ജനങ്ങളോടുള്ള പഞ്ചായത്തിന്റെ ഈ സ്നേഹപൂർണ്ണമായ സമീപനത്തിന് മികച്ച പ്രതികരണമാണ് പൊതുജനങ്ങളിൽ നിന്നും ലഭിക്കുന്നത്.
