പൊന്നാനിയിൽ കോവിഡ് കുറയുന്നില്ല
പൊന്നാനി: കോവിഡിനെ പിടിച്ചുനിർത്താൻ പ്രതിരോധപ്രവർത്തനങ്ങൾ ശക്തമാക്കിയിട്ടും പൊന്നാനി നഗരസഭാപരിധിയിൽ രോഗികളുടെ എണ്ണത്തിൽ കുറവില്ല. കഴിഞ്ഞയാഴ്ച ‘സി’ കാറ്റഗറിയിലായിരുന്ന നഗരസഭ ഇത്തവണ ‘ഡി’യിലേക്കു മാറി.
പൊന്നാനി താലൂക്കാശുപത്രി, ഈഴുവത്തിരുത്തി പ്രാഥമികാരോഗ്യകേന്ദ്രം എന്നിവിടങ്ങളിൽ ആന്റിജെൻ പരിശോധനകളുടെ എണ്ണം കൂട്ടി. വാക്സിൻ വിതരണം ഊർജിതപ്പെടുത്തുകയും ചെയ്തിട്ടുണ്ട്. കോവിഡ് ബാധിതർക്കായി സി.എഫ്.എൽ.ടി.സി.യും ഡി.സി.സി. സെന്ററും കാര്യക്ഷമമായാണ് പ്രവർത്തിക്കുന്നത്. സമൂഹ അടുക്കള വഴിയുള്ള ഭക്ഷണവിതരണവും മുടങ്ങാതെ നടക്കുന്നു.
കഴിഞ്ഞദിവസം താലൂക്കാശുപത്രിയിൽ പരിശോധിച്ച 125 പേരിൽ 46 പേർക്കും പോസിറ്റീവായി.
ഇക്കാര്യത്തിൽ നഗരസഭയ്ക്കെതിരേ നടക്കുന്ന കുപ്രചാരണങ്ങൾ തള്ളിക്കളയണമെന്ന് നഗരസഭാ അധികൃതർ പറഞ്ഞു. വ്യാഴാഴ്ചയും വെള്ളിയാഴ്ചയുമായി തീരദേശമേഖലയിൽ വാക്സിൻ വണ്ടികളും സേവനം നടത്തുന്നുണ്ട്.
