കരിപ്പൂരിൽ നിന്നുള്ള ഹജ്ജ് യാത്രാ നിരക്കില് വന് കുറവ്; കഴിഞ്ഞ വര്ഷത്തെ 1.25 ലക്ഷം രൂപ 1.07 ലക്ഷമായി..
കോഴിക്കോട് : അടുത്ത വർഷത്തെ വിശുദ്ധ ഹജ്ജ് തീർഥാടകരെ പുണ്യഭൂമിയിലേക്ക് കൊണ്ടുപോകുന്നതിനുള്ള വിമാനക്കമ്പനികളുമായി ധാരണയായതോടെ യാത്ര നിരക്കിൽ ഗണ്യമായ കുറവ്. കേരളത്തിലെ പ്രധാന ഹജ്ജ് പുറപ്പെടൽ കേന്ദ്രമായ കരിപ്പൂരിൽ നിന്നുള്ള യാത്രാ നിരക്കിലാണ് ഏറ്റവും വലിയ ആശ്വാസം ഉണ്ടായിരിക്കുന്നത്.
കഴിഞ്ഞ വർഷം കരിപ്പൂരിൽ നിന്ന് ഹജ്ജിന് പോകാൻ ഒരു തീർഥാടകൻ 1.25 ലക്ഷം രൂപയോളം നൽകേണ്ടി വന്നിരുന്ന സ്ഥാനത്ത്, ഈ വർഷം ഇത് 1.07 ലക്ഷം രൂപയായി കുറഞ്ഞു. ഇത് ഓരോ തീർഥാടകനും ഏകദേശം 18,000 രൂപയുടെ കുറവാണ് നൽകുന്നത്.
മുംബൈ ആസ്ഥാനമായി പ്രവർത്തിക്കുന്ന ആകാശ എയറിനാണ് കരിപ്പൂരിൽ നിന്ന് ഹജ്ജ് സർവീസ് നടത്താനുള്ള ടെൻഡർ ലഭിച്ചിരിക്കുന്നത്.കരിപ്പൂരിലെ നിരക്കിൽ വലിയ കുറവുണ്ടായെങ്കിലും, കേരളത്തിലെ മറ്റ് വിമാനത്താവളങ്ങളെ അപേക്ഷിച്ച് ഇവിടെയാണ് ഇപ്പോഴും ഏറ്റവും ഉയർന്ന യാത്രാക്കൂലി.
അടുത്ത വർഷത്തെ ഹജ്ജ് സർവിസിനുള്ള ടെൻഡറിൽ കരിപ്പൂരിൽ എയർ ഇന്ത്യയെ പിന്തള്ളി ഈവർഷം ആകാശ എയർ. 1210 ഡോളറിനാണ് കരിപ്പൂരിൽനിന്ന് ആകാശ എയർ ടെൻഡർ പിടിച്ചത്. കൊച്ചിയിൽ ഫ്ളൈനാസ് 989 ഡോളറിനും കണ്ണൂരിൽ ഫ്ളൈഡീൽ 1012 ഡോളറിനുമാണ് ടെൻഡർ പിടിച്ചത്. എയർ ഇന്ത്യ, സഊദി എയർലെൻസ് ഇത്തവണ സർവിസിനില്ല.
വിമാനക്കമ്പനികളുടെ ടെൻഡർ സമർപ്പണത്തിനുള്ള അവസാന തീയതി ഈമാസം 25 ആയിരുന്നു. 26നു ലഭ്യമായ അപേക്ഷകൾ പ്രകാരമാണ് വിമാനക്കമ്പനികളെ പ്രഖ്യാപിച്ചത്. ഈ വർഷം 8,530 പേരെയാണ് ഹജ്ജിന് തിരഞ്ഞെടുത്തത്.
കൊച്ചിയിൽ നിന്ന് ഹജ്ജ് യാത്ര നിരക്ക് 87,697 രൂപയാണ്. സൗദിയുടെ ബജറ്റ് വിമാനക്കമ്പനിയായ ഫ്ലൈനാസിനാണ് കൊച്ചിയിൽ നിന്നുള്ള സർവീസിന് അനുമതി.കണ്ണൂരിൽ നിന്ന് യാത്രാ നിരക്ക് 89,737 രൂപയാണ്. സൗദിയുടെ മറ്റൊരു ബജറ്റ് വിമാനക്കമ്പനിയായ ഫ്ലൈഡീൽ ആണ് സർവീസ് നടത്തുക.
പുതിയ നിരക്കനുസരിച്ച് കരിപ്പൂരിൽ നിന്നുള്ള യാത്രാക്കൂലി കൊച്ചിയിലെ നിരക്കിനേക്കാൾ 19,303 രൂപയും കണ്ണൂരിലെ നിരക്കിനേക്കാൾ 17,263 രൂപയും കൂടുതലാണ്.
കഴിഞ്ഞ തവണ കരിപ്പൂരിലെയും കണ്ണൂരിലെയും നിരക്കുകൾ തമ്മിൽ ഏകദേശം 40,000 രൂപയുടെ ഭീമമായ വ്യത്യാസമാണ് ഉണ്ടായിരുന്നത്. എന്നാൽ ഇത്തവണ ഈ വ്യത്യാസം 18,000 രൂപ മുതൽ 19,000 രൂപ വരെയായി കുറയ്ക്കാൻ സാധിച്ചു. ഇത് മലപ്പുറം ജില്ലയിലെയും സമീപ പ്രദേശങ്ങളിലെയും തീർഥാടകർക്ക് കരിപ്പൂരിനെ വീണ്ടും പ്രധാന ഹജ്ജ് പുറപ്പെടൽ കേന്ദ്രമായി തിരഞ്ഞെടുക്കാൻ കൂടുതൽ പ്രോത്സാഹനമാകും.
ആകാശ എയർ, ഫ്ലൈനാസ്, ഫ്ലൈഡീൽ എന്നിവർക്ക് പുറമെ എയർ ഇന്ത്യയും സൗദി എയർലൈൻസും ടെൻഡർ നടപടികളിൽ പങ്കെടുത്തിരുന്നു.
