MALAPPURAM
രണ്ടാം ട്രയൽ റണ്ണിൽ വന്ദേ ഭാരത് തിരൂരിൽ നിർത്തിയില്ല; സ്റ്റോപ്പ് ഒഴിവാക്കിയിട്ടില്ലെന്ന് റെയിൽവേ
ആദ്യദിവസത്തേക്കാൾ വേഗം കൂട്ടിയാണ് ട്രെയിൻ എത്തിയത്. തിരുവനന്തപുരത്തു നിന്ന് പുലർച്ചെ 5.20ന് പുറപ്പെട്ട വണ്ടി തിരൂർ കടന്നുപോകാൻ എടുത്ത സമയം 5 മണിക്കൂർ 24 മിനിറ്റാണ്. കഴിഞ്ഞ തവണ ഇതിനുവേണ്ടി വന്നത് അഞ്ചുമണിക്കൂർ 36 മിനിറ്റാണ്. തിരൂരിൽ നിർത്തിയില്ലെങ്കിലും കോഴിക്കോട്ട് 5 മിനിറ്റോളം നിർത്തുകയും ചെയ്തു.
കണ്ണൂർ മുതൽ കാസർഗോഡ് വരെയുള്ള ഭാഗത്തെ ട്രയൽ റണ്ണിന് പ്രാമുഖ്യം കൊടുക്കുകയാണ് ഇന്നലെ ചെയ്തതെന്നും അതിനായി വേഗത്തിൽ എത്താനാണ് തിരൂരിൽ നിർത്താതെ പോയതെന്നും പാലക്കാട് ഡിവിഷനിലെ ഉദ്യോഗസ്ഥർ പറഞ്ഞു. തിരൂരിലെ സ്റ്റോപ്പ് ഒഴിവാക്കാൻ തീരുമാനിച്ചിട്ടില്ലന്നും ഇവർ അറിയിച്ചു.25നാണ് ട്രെയിൻ സർവീസ് തുടങ്ങുന്നത്
