ചിത്രരചനയിൽ വിസ്മയമായി അമൽ ഇംഗ്ലീഷ് സ്കൂൾ: അഖില കേരള മത്സരത്തിൽ കിരീടനേട്ടം.
ഗുരുവായൂർ: മെട്രോ ലിങ്ക്സ് ഫാമിലി ക്ലബ് സംഘടിപ്പിച്ച പതിനേഴാമത് അഖില കേരള ചിത്രരചന മത്സരത്തിൽ സമഗ്രാധിപത്യം പുലർത്തി ചമ്മനൂർ അമൽ ഇംഗ്ലീഷ് സ്കൂൾ ജേതാക്കളായി. കേരളത്തിന്റെ വിവിധ ഭാഗങ്ങളിൽ നിന്നായി 3400-ൽ പരം വിദ്യാർത്ഥികൾ പങ്കെടുത്ത വാശിയേറിയ പോരാട്ടത്തിലാണ് ഏറ്റവും കൂടുതൽ പോയിന്റുകൾ കരസ്ഥമാക്കി അമൽ സ്കൂൾ ഒന്നാമതെത്തിയത്.
മികച്ച പങ്കാളിത്തം ഉറപ്പാക്കിയ സ്കൂളുകൾക്കുള്ള പ്രത്യേക പുരസ്കാരവും അമൽ ഇംഗ്ലീഷ് സ്കൂൾ സ്വന്തമാക്കി. അൻസാർ സ്കൂളും പങ്കാളിത്തത്തിനുള്ള പുരസ്കാരം പങ്കിട്ടു.പ്രൗഢഗംഭീരമായ പുരസ്കാര സമർപ്പണം ചാവക്കാട് മുനിസിപ്പൽ ചെയർമാൻ എ.എച്ച്. അക്ബർ ഉദ്ഘാടനം ചെയ്തു. കലാരംഗത്തെ അതുല്യ പ്രതിഭ ഡാവിഞ്ചി സുരേഷ് മുഖ്യാതിഥിയായി പങ്കെടുത്തു. വിജയികൾക്കുള്ള ട്രോഫികളും സർട്ടിഫിക്കറ്റുകളും വിശിഷ്ടാതിഥികൾ ചേർന്ന് വിതരണം ചെയ്തു.
ചടങ്ങിൽ ശിവജി ഗുരുവായൂർ (പ്രശസ്ത സിനിമ നടൻ), സിസ്റ്റർ ഡോ. ജെന്നി തെരേസ (പ്രിൻസിപ്പാൾ, എൽ.എഫ് കോളേജ്) ജയ്സൺ ഗുരുവായൂർ എന്നീ ശ്രദ്ധേയരായ വ്യക്തിത്വങ്ങളുടെ സാന്നിധ്യമുണ്ടായിരുന്നു.
അമൽ സ്കൂളിന്റെ വിജയഗാഥവിദ്യാർത്ഥികളുടെ സർഗ്ഗാത്മക കഴിവുകൾക്ക് സ്കൂൾ നൽകുന്ന മികച്ച പരിശീലനത്തിന്റെയും പ്രോത്സാഹനത്തിന്റെയും ഫലമാണ് ഈ ഉജ്ജ്വല വിജയമെന്നും, പ്രിൻസിപ്പാൾ ഗഫൂർ നാലകത്തിന്റെ കൃത്യമായ മാർഗ്ഗനിർദ്ദേശങ്ങളും, അധ്യാപകരുടെയും രക്ഷിതാക്കളുടെയും കൂട്ടായ പരിശ്രമവുമാണ് അമൽ സ്കൂളിനെ ഈ വലിയ നേട്ടത്തിലേക്ക് നയിച്ചതെന്നും അമൽ സ്കൂൾ ചെയർമാൻ അലി പഷ്ണത്തയിൽ അഭിപ്രായപ്പെട്ടു
