സിഐ ബഷീർ ചിറക്കലിന്റെ നേതൃത്വത്തിൽ സഹപാഠിക്ക് വീടൊരുങ്ങിയത് 110 ദിവസം കൊണ്ട്
May 21, 2023
110 ദിവസം കൊണ്ട് സഹപാഠിക്ക് വീടൊരുക്കി ഒരു പോലീസ് ഉദ്യോഗസ്ഥനും സഹപാഠികളും.ചങ്ങരംകുളം സർക്കിൾ ഇൻസ്പെക്ടർ ബഷീർ ചിറക്കൽ മുൻകയ്യെടുത്താണ് സമൂഹത്തിൽ ഏറെ പിന്തുണയും കയ്യടിയും നേടിയ സ്നേഹഭവനം ഒരുങ്ങിയത്. ഈ വർഷത്തെ കണ്ണേങ്കാവ് പൂരത്തിൽ നിന്ന് മധുരപലഹാരങ്ങൾ വാങ്ങി തന്റെ ഭാര്യക്കൊപ്പം സഹപാഠിയുടെ വീട് തേടി ഇറങ്ങിയ ബഷീർ സാറിന് വീട് പറഞ്ഞു കൊടുക്കാൻ സഹപാഠി തയ്യാറായില്ലെങ്കിലും ലൊക്കേഷൻ തപ്പി തിരഞ്ഞുപിടിച്ച് വീട് കണ്ടെത്തി ഉപഹാരങ്ങൾ നൽകി. സഹപാഠിയുടെ വീട് കണ്ടപ്പോൾ തന്നെ മനസ്സ് തളർന്ന ബഷീർ സാറിനെ അവരുമായുള്ള സംസാരത്തിനിടയിലെ കണ്ണുനീർ കണ്ടപ്പോൾ മറ്റൊന്നും ചിന്തിക്കാൻ ഉണ്ടായിരുന്നില്ല. സഹപാഠികളെയും സുമനസ്സുകളെയും വിവരമറിയിച്ചപ്പോൾ എല്ലാവിധ പിന്തുണയും ബഷീർ ചിറക്കല്ലിന് ലഭിച്ചു. 110 ദിവസങ്ങൾക്കിപ്പുറം സഹപാഠിയുടെ വീടിന്റെ പാലുകാച്ചൽ ചടങ്ങ് നടക്കുമ്പോൾ ഔദ്യോഗിക കൃത്യനിർവഹണത്തിന് സഹപാഠികളുടെയും സുമനസ്സുകളുടെയും സഹകരണത്തോടെ ഒരു വീട് നിർമ്മിച്ചു നൽകാൻ കാണിച്ച സേവനത്തിന് പോലീസ് സേനയിൽ നിന്നും നാട്ടുകാരിൽ നിന്നും ഏറെ പിന്തുണയും പ്രാർത്ഥനകളും ആശംസകളുമാണ് ബഷീർ ചിറക്കലിനെ തേടിയെത്തുന്നത്.
