പെട്രോൾ-ഡീസൽ വിലവർധനവിനെതിരെ എഫ്സിഐ ഗോഡൗണിലേക്ക് പ്രതിഷേധ മാർച്ച്; കേന്ദ്ര സർക്കാരിനെതിരെ രൂക്ഷ വിമർശനവുമായി കെ.ടി. ജലീൽ
കുറ്റിപ്പുറം: പെട്രോൾ, ഡീസൽ വിലവർധനവിനെതിരെ സിപിഐ(എം) വളാഞ്ചേരി ഏരിയാ കമ്മിറ്റിയുടെ നേതൃത്വത്തിൽ കുറ്റിപ്പുറം എഫ്സിഐ ഗോഡൗണിലേക്ക് പ്രതിഷേധ മാർച്ച് സംഘടിപ്പിച്ചു. കേന്ദ്ര സർക്കാരിന്റെ ഇന്ധന വിലനയങ്ങൾ സാധാരണ ജനങ്ങളുടെ ജീവിതത്തെ ദുസ്സഹമാക്കുന്നതായി ആരോപിച്ചാണ് പ്രതിഷേധം സംഘടിപ്പിച്ചത്.
പ്രതിഷേധ മാർച്ച് മുൻ മന്ത്രി കെ . ടി . ജലീൽ ഉദ്ഘാടനം ചെയ്തു. ഇന്ധനവിലയിലെ തുടർച്ചയായ വർധനവ് നിത്യോപയോഗ സാധനങ്ങളുടെ വിലക്കയറ്റത്തിനും ജനങ്ങളുടെ ജീവിതച്ചെലവ് ഉയരുന്നതിനും കാരണമാകുകയാണെന്ന് അദ്ദേഹം പറഞ്ഞു. കേന്ദ്ര സർക്കാർ ജനങ്ങളുടെ മേൽ അധിക സാമ്പത്തികഭാരം അടിച്ചേൽപ്പിക്കുകയാണെന്നും വിലക്കയറ്റം നിയന്ത്രിക്കാൻ അടിയന്തര ഇടപെടൽ വേണമെന്നും അദ്ദേഹം ആവശ്യപ്പെട്ടു.
സിപിഐ(എം) വളാഞ്ചേരി ഏരിയാ സെക്രട്ടറി വി.കെ. രാജീവ് അധ്യക്ഷത വഹിച്ചു. ജില്ലാ കമ്മിറ്റി അംഗം കെ.പി. ശങ്കരൻ, കെ. രാമദാസ്, എൻ. വേണുഗോപാലൻ, സി. വിജയകുമാർ, ടി. ദിനേഷ് എന്നിവർ വിവിധ വിഷയങ്ങളിൽ സംസാരിച്ചു. ഇന്ധനവില വർധനവിനെതിരെ രാജ്യവ്യാപകമായി ഉയരുന്ന പ്രതിഷേധങ്ങളുടെ ഭാഗമായാണ് മാർച്ച് സംഘടിപ്പിച്ചതെന്ന് നേതാക്കൾ പറഞ്ഞു. പ്രതിഷേധ മാർച്ചിൽ പാർട്ടി പ്രവർത്തകരും അനുഭാവികളും ഉൾപ്പെടെ നിരവധി പേർ പങ്കെടുത്തു. കേന്ദ്ര സർക്കാരിന്റെ ജനവിരുദ്ധ നയങ്ങൾക്കെതിരെ ശക്തമായ ജനകീയ പ്രക്ഷോഭങ്ങൾ തുടരുമെന്ന് നേതാക്കൾ മുന്നറിയിപ്പ് നൽകി. സി.കെ. ജയകുമാർ സ്വാഗതവും സി. വേലായുധൻ നന്ദിയും രേഖപ്പെടുത്തി. പ്രതിഷേധ പരിപാടി സമാധാനപരമായി സമാപിച്ചു.
