ഒക്ടോബർ 15 മുതൽ ₹2,000ന് മുകളിലുള്ള UPI പേയ്മെന്റ് സ്വീകരിക്കില്ലെന്ന് പെട്രോൾ പമ്പുകൾ; പുതിയ നിരക്കിനെതിരെ പ്രതിഷേധം
ന്യൂഡൽഹി: പെട്രോൾ പമ്പുകളിലെ ₹2,000ന് മുകളിലുള്ള UPI ഇടപാടുകൾക്ക് ഒക്ടോബർ 15 മുതൽ നിയന്ത്രണം ഏർപ്പെടുത്തുമെന്ന് മുന്നറിയിപ്പുമായി ഇന്ധന ഡീലർമാർ. UPI ഇടപാടുകൾക്ക് നിർദേശിച്ചിരിക്കുന്ന 0.4 ശതമാനം Merchant Discount Rate (MDR) പിൻവലിക്കണമെന്നാണ് പെട്രോളിയം ഡീലർമാരുടെ ആവശ്യം. നിരക്ക് പിൻവലിച്ചില്ലെങ്കിൽ വലിയ തുകയ്ക്കുള്ള UPI പേയ്മെന്റുകൾ സ്വീകരിക്കില്ലെന്നാണ് ചില ഡീലർമാർ വ്യക്തമാക്കിയിരിക്കുന്നത്. ( Petrol Pump UPI Payment Limit)ഇന്ധന വിൽപ്പനയിൽ UPI ഇടപാടുകൾക്ക് MDR പൂർണമായി ഒഴിവാക്കണമെന്നാണ് ഡീലർമാരുടെ ആവശ്യം. പ്രവർത്തനച്ചെലവുകൾ വർധിച്ച സാഹചര്യത്തിൽ അധിക ഇടപാട് നിരക്ക് കൂടി വഹിക്കുന്നത് ബുദ്ധിമുട്ടാണെന്നാണ് അവരുടെ വാദം.
ഓൾ ഇന്ത്യ പെട്രോളിയം ഡീലേഴ്സ് അസോസിയേഷനും പെട്രോൾ പമ്പുകളിലെ UPI ഇടപാടുകൾക്ക് MDR ഒഴിവാക്കണമെന്ന് ആവശ്യപ്പെട്ടിട്ടുണ്ട്. നിർദേശം നടപ്പായാൽ പെട്രോൾ, ഡീസൽ എന്നിവയ്ക്ക് ₹2,000ന് മുകളിൽ UPI വഴി പണമടയ്ക്കുന്ന ഉപഭോക്താക്കളെ ഇത് നേരിട്ട് ബാധിച്ചേക്കും. പ്രത്യേകിച്ച് വലിയ തുകയ്ക്ക് ഇന്ധനം വാങ്ങുന്നവർക്ക് മറ്റ് പേയ്മെന്റ് മാർഗങ്ങൾ ഉപയോഗിക്കേണ്ട സാഹചര്യമുണ്ടാകാം.അതേസമയം, UPI ഇടപാടുകളിലെ നിർദേശിച്ച MDR സംബന്ധിച്ച് വ്യാപാര മേഖലയിലും ആശങ്ക ഉയർന്നിട്ടുണ്ട്. നേരത്തെ മധ്യപ്രദേശിലെ പെട്രോൾ പമ്പ് ഡീലർമാരും വലിയ തുകയ്ക്കുള്ള UPI പേയ്മെന്റുകൾ സ്വീകരിക്കുന്നത് നിർത്തിയേക്കുമെന്ന് മുന്നറിയിപ്പ് നൽകിയിരുന്നു. ഇന്ധന വിൽപ്പനയെ MDR-ൽ നിന്ന് പൂർണമായി ഒഴിവാക്കണമെന്നാണ് അവരുടെ ആവശ്യം. പുതിയ നിരക്ക് സംബന്ധിച്ച ചർച്ചകൾ തുടരുന്നതിനിടെയാണ് ഒക്ടോബർ 15 മുതൽ നിയന്ത്രണം ഏർപ്പെടുത്തുമെന്ന മുന്നറിയിപ്പ്. നിർദേശം പ്രാബല്യത്തിൽ വന്നാൽ പെട്രോൾ പമ്പുകളിൽ വലിയ തുകയ്ക്കുള്ള UPI പേയ്മെന്റുകളുടെ ഉപയോഗത്തിൽ മാറ്റമുണ്ടാകാനിടയുണ്ട്.
