സ്വന്തം കാര്‍ കത്തിച്ച്‌ ഇന്‍ഷുറന്‍സ് തുക തട്ടാന്‍ നീക്കം; ബിജെപി ജില്ലാ സെക്രട്ടറി അറസ്റ്റില്‍
സ്വന്തം കാര്‍ കത്തിച്ച്‌ ഇന്‍ഷുറന്‍സ് തുക തട്ടിയെടുക്കാനുള്ള നീക്കത്തിനിടെ ബിജെപി ജില്ലാ സെക്രട്ടറി തമിഴ്‌നാട്ടില്‍ അറസ്റ്റില്‍. ഈ മാസം 14-ന് രാത്രിയാണ് ബിജെപി തിരുവള്ളൂര്‍ വെസ്റ്റ് ജില്ലാ സെക്രട്ടറി സതീഷ് കുമാര്‍ സ്വന്തം കാര്‍ കത്തിനശിച്ചത്. എന്നാല്‍ കാര്‍ കത്തിച്ചത് മറ്റാരോ ആണെന്ന തരത്തില്‍ അദ്ദേഹത്തിന്റെ കുടുംബം പൊലീസില്‍ പരാതി നല്‍കിയിരുന്നു. അന്വേഷണത്തില്‍ അറസ്റ്റ് ചെയ്ത സതീഷ് കുമാറിനെ പൊലീസ് പിന്നീട് വിട്ടയച്ചു.
ചെന്നൈ മധുരവോയല്‍ പ്രദേശത്തുള്ള വീടിന് മുന്നില്‍ നിര്‍ത്തിയിട്ട കാറാണ് കത്തിനശിച്ചത്. പൊലീസ് സിസിടിവി ദൃശ്യങ്ങള്‍ പരിശോധിച്ചപ്പോഴാണ് കാറ് കത്തിക്കലിന് പിന്നിലെ കള്ളം പൊളിഞ്ഞത്. വെള്ള ഷര്‍ട്ട് ധരിച്ച ഒരാള്‍ റോഡരികില്‍ പാര്‍ക്ക് ചെയ്തിരുന്ന കാറിനരികിലേക്ക് വരുന്നതും കാര്‍ പരിശോധിക്കുന്നതും സിസിടിവി ദൃശ്യത്തില്‍ കാണാം. നിമിഷങ്ങള്‍ക്കകം ഇരുണ്ട വസ്ത്രം ധരിച്ച മറ്റൊരാള്‍ കാറിലേക്ക് എന്തോ ഒഴിക്കുകയോ സ്പ്രേ ചെയ്യുകയോ ചെയ്യുന്നതും തുടര്‍ന്ന് തീയിടുന്നതും കാണാമായിരുന്നു.
തുടര്‍ന്ന് സമീപത്തെ സിസിടിവി ദൃശ്യങ്ങള്‍ പരിശോധിച്ചപ്പോള്‍ കാറിന് തീയിട്ടത് സതീഷ് കുമാറിനോട് സാമ്യമുള്ള ആളാണെന്ന് പൊലീസിന് മനസ്സിലായി. ഇയാളെ ചോദ്യം ചെയ്തതോടെ താന്‍ തന്നെയാണ് കാറിന് തീയിട്ടതെന്ന് സമ്മതിക്കുകയും ചെയ്തു.
