ആലംകോട് ഗ്രാമപഞ്ചായത്തിൽ സുസ്ഥിര മാലിന്യവ്യവസ്ഥയുടെ പ്രഖ്യാപനം സംഘടിപ്പിച്ചു
ആലംകോട് ഗ്രാമപഞ്ചായത്തിൽ സമ്പൂർണ മാലിന്യ മുക്തമായി പ്രഖ്യാപിച്ചു. മാർച്ച് 27, 2025 വൈകുന്നേരം 3:30 ന് ചങ്ങരാങ്കുളം ബസ്റ്റാൻഡിൽ വെച്ച് ആഘോഷപൂർവ്വം നടന്നു. പരിസ്ഥിതി സംരക്ഷണത്തിനും ശുചിത്വ പരിപാലനത്തിനുമായി പഞ്ചായത്ത് സ്വീകരിച്ച നിർണായക മുന്നേറ്റത്തിന്റെ ഭാഗമായിരുന്നു ഈ പ്രഖ്യാപനം.
പരിപാടിയുടെ ഔപചാരിക ഉദ്ഘാടന കർമ്മം പൊന്നാനി എം.എൽ.എ ശ്രീ. പി. നന്ദകുമാർ നിർവഹിച്ചു. ചടങ്ങിൽ ആലംകോട് പഞ്ചായത്ത് പ്രസിഡന്റ് ശ്രീ. ഷഹീർ കെ.വി അധ്യക്ഷനായിരുന്നു. ഗ്രാമപഞ്ചായത്ത് അംഗങ്ങൾ, തദ്ദേശവാസികൾ, വിദ്യാർത്ഥികൾ, പരിസ്ഥിതി പ്രവർത്തകർ എന്നിവർ പരിപാടിയിൽ സജീവമായി പങ്കെടുത്തു.
സുസ്ഥിര മാലിന്യ സംസ്കരണത്തിന്റെ പ്രാധാന്യത്തെക്കുറിച്ച് സംസാരിച്ചു, പഞ്ചായത്ത് പരിധിയിൽ മാലിന്യ സംസ്കരണ സംവിധാനം ശക്തിപ്പെടുത്തുന്നതും, പ്ലാസ്റ്റിക് മാലിന്യ നിയന്ത്രണം ഉറപ്പാക്കുന്നതും സംബന്ധിച്ച് നിർണായക നിർദേശങ്ങൾ മുന്നോട്ടുവെക്കപ്പെട്ടു. തദ്ദേശവാസികളുടെ സഹകരണം ഉറപ്പാക്കുന്നതിനായി ബോധവൽക്കരണ ജാഥകളും പരിസ്ഥിതി സംരക്ഷണ പ്രചാരണങ്ങളും സംഘടിപ്പിച്ചു. ജില്ലയിൽ തന്നെ ഹരിത മിത്രം ആപ് വഴി 100% സേവനം നൽകിയ ആദ്യത്തെ പഞ്ചായത്ത് ആണ് ആലംകോട്
പരിസ്ഥിതി സൗഹൃദ വികസനം ഉറപ്പുവരുത്തുന്നതിനായി മൂല്യാധിഷ്ഠിത മാലിന്യ സംസ്കരണ മാതൃകകൾ വീടുകളിൽ നിന്നും വ്യാപാര സ്ഥാപനങ്ങളിൽ നിന്നും മാലിന്യങ്ങൾ ശാസ്ത്രീയമായി ശേഖരിക്കുന്നതിനുള്ള പദ്ധതികൾ തുടങ്ങിയവയുടെ പ്രാധാന്യവും യോഗത്തിൽ ചർച്ചയായി.
പഞ്ചായത്ത് ഭരണ സമിതിയും, വിവിധ സാമൂഹിക സംഘടനകളും ചേർന്ന് പരിപാടി വിജയകരമായി സംഘടിപ്പിച്ചു. പൊതുജനങ്ങൾക്കും പരിസ്ഥിതി പ്രവർത്തകർക്കും സമഗ്രമായ ബോധവൽക്കരണ പരിപാടികൾ അവതരിപ്പിക്കുകയും, ശുചിത്വ പരിപാലനം ഉറപ്പാക്കാൻ ആവശ്യമായ നിർദേശങ്ങൾ നൽകുകയും ചെയ്തു.
പരിസ്ഥിതി സംരക്ഷണത്തിൽ ആലംകോട് പഞ്ചായത്തിന്റെ ഈ മുന്നേറ്റം ഭാവിയിൽ ഗ്രാമവികസനത്തിനും പരിസ്ഥിതി സംരക്ഷണത്തിനും മാതൃകയാകുമെന്ന് നേതാക്കൾ പ്രസ്താവിച്ചു.
IRTC ഹരിത സഹായ സ്ഥാപനം ആയി പ്രവർത്തിക്കുന്ന പഞ്ചായത്തിൽ 32 ഹരിത കർമ സേന അംഗകൾ ആണ് പ്രവർത്തിച്ചു വരുന്നത് .യോഗത്തിൽ IRTC ജില്ല കോർഡിനേറ്റർ സുധിക് ചേകവർ , ക്ലസ്റ്റർ കോർഡിനേറ്റർ ഭരതൻ , അസിസ്റ്റൻ്റ് കോർഡിനേറ്റർ ദീപക് എന്നിവർ പങ്കു ചേർന്നു.
