തിരമാലകള്‍ക്ക് മുകളിലൂടെ കടലിലേക്ക് നടക്കാം; ഒട്ടുംപുറം ബീച്ചില്‍ പഴുതടച്ച സുരക്ഷാ ക്രമീകരണങ്ങള്‍ ഒരുക്കും…
താനൂര്‍: വിനോദസഞ്ചാര കേന്ദ്രമായ ഒട്ടും പുറം തീരത്ത് ഇനി തിരമാലകള്‍ക്കു മുകളിലൂടെ നടന്നു പോകാം. തൂവല്‍ തീരം ബീച്ചില്‍ എന്ന തിരമാലകള്‍ക്ക് മുകളിലൂടെയാണ് പുതുമയുമായി കടലിലേക്ക് നടക്കാനുള്ള പദ്ധതിക്ക് തുടക്കമാകുന്നത്. സാഹസിക ടൂറിസം പ്രോത്സാഹിപ്പിക്കുന്നതിന്റെ ഭാഗമായി ജില്ലാ ടൂറിസം പ്രമോഷന്‍ കൗണ്‍സിലാണ് പൊങ്ങിയൊഴുകുന്ന പാലത്തിലൂടെയുള്ള സവാരി ആരംഭിക്കുന്നത്.
തീരത്ത് നിന്ന് കടലിലേക്ക് 100 മീറ്റര്‍ കാല്‍നടയായി യാത്ര ചെയ്യാന്‍ പറ്റുന്ന രീതിയിലാണ് ഫ്‌ലോട്ടിങ് ബ്രിഡ്ജ്. തൂവല്‍ തീരം അമ്യൂസ്‌മെന്റ് പ്രൈവറ്റ് ലിമിറ്റഡിനാണ് നിര്‍മാണ ചുമതല. രാവിലെ 10 മുതല്‍ വൈകിട്ട് 6.45 വരെയാണ് പ്രവേശനം. 120 രൂപയാണ് പ്രവേശന ഫീസ് പഴുതടച്ച സുരക്ഷാക്രമീകരണങ്ങള്‍ ഒരുക്കുന്നതിന്റെ ഭാഗമായി സുരക്ഷാ ബോട്ടുകളും ലൈഫ് ജാക്കറ്റുകളും ഉണ്ടാകും. ലൈഫ് ഗാര്‍ഡ്, മത്സ്യത്തൊഴിലാളികള്‍ എന്നിവരുടെ സേവനവും ഉപയോഗപ്പെടുത്തും.
പാലത്തിന് 7000 കിലോഗ്രാം ഭാരമുള്ള നഗൂരം ഉപയോഗിച്ച് ഉറപ്പിച്ചു നിര്‍ത്തി സുരക്ഷിതമാക്കും. ഫൈബര്‍ എച്ച്ഡിപിഇ വിദേശനിര്‍മ്മിത പാലത്തില്‍ ഇന്റര്‍ലോക്ക് മാതൃകയില്‍ കട്ടകള്‍ അടുക്കി വെച്ചാണ് കടല്‍ പരപ്പിന് മുകളില്‍ യാത്ര സജ്ജീകരിക്കുന്നത്. മൂന്നു മീറ്റര്‍ വീതിയില്‍ ഇരുഭാഗത്തും സ്റ്റീല്‍ കൈവരികളുമുണ്ട്.
പാതയുടെ അവസാനഭാഗത്ത് 11 മീറ്റര്‍ നീളവും 7 മീറ്റര്‍ വീതിയിലും ഒഴുകുന്ന സൈറ്റ് സീയിങ് പ്ലാറ്റ്‌ഫോമും പണിതിട്ടുണ്ട്. ഇവിടെനിന്ന് കടലിന്റെ ആവാസ വ്യവസ്ഥയും തിരമാലകളുടെ പ്രതിഭാസങ്ങളും അനുഭവിച്ചറിയാം. മൂന്നു വയസ്സിന് താഴെയുള്ളവര്‍ക്കും പ്രായമായവര്‍ക്കും ഭിന്നശേഷിക്കാര്‍ക്കും ലഹരി വസ്തുക്കള്‍ ഉപയോഗിച്ചവര്‍ക്കും പ്രവേശനം അനുവദിക്കുകയില്ല.
