THRISSUR
തൃശൂരിൽ പെരുമഴയത്ത് റോഡ് ടാറിംഗ്; നാട്ടുകാരെത്തി തൊഴിലാളികളെ ഓടിച്ചുവിട്ടു
തൃശൂർ: കനത്ത മഴയ്‌ക്കിടെ തൃശൂരിൽ റോഡ് ടാറിംഗ്. കോർപ്പറേഷൻ പരിധിയിലുള്ള മാരാർ റോഡിലാണ് കനത്ത മഴയ്‌ക്കിടെ ടാറിംഗ് തുടങ്ങിയത്. ജില്ലയിൽ ഇന്ന് റെഡ് അലർട്ടാണ്. നാട്ടുകാരെത്തി ദൃശ്യങ്ങൾ പക‌ർത്തി പ്രചരിപ്പിച്ചതോടെയാണ് ടാറിടൽ നിർത്തിവയ്‌ക്കാൻ മേയർ എംകെ വർഗീസ് നിർദേശം നൽകിയത്.
കഴിഞ്ഞ ദിവസങ്ങളിലെല്ലാം നല്ല വെയിലായിരുന്നിട്ടും ടാറിടാൻ ആരുമെത്തിയിരുന്നില്ല. ഇന്ന് പെരുമഴ തുടരുന്നതിനിടെയാണ് ടാറിടാനെത്തിയത്. നാട്ടുകാർ തൊഴിലാളികളോട് ദേഷ്യത്തിൽ സംസാരിക്കുന്നതിന്റെ ദൃശ്യങ്ങളും പുറത്തുവന്നിട്ടുണ്ട്. ഈ വർഷം ഉണ്ടായതിൽ വച്ച് ഏറ്റവും ശക്തമായ മഴയാണ് ഇന്നുണ്ടായത്. റോഡിലൂടെ വെള്ളം കുത്തിയൊലിക്കുന്നതിനിടെയാണ് ടാറിടുന്നത്. തൃശൂർ കോർപ്പറേഷനെതിരെ ശക്തമായ ഭാഷയിലാണ് നാട്ടുകാർ പ്രതികരിച്ചത്.
