ജാമ്യ വ്യവസ്ഥയില്‍ ഇളവും കേരളത്തിലേക്ക് പോകാന്‍ അനുമതിയും തേടി മദനി; ഹര്‍ജി തള്ളി സുപ്രിംകോടതി.
ബംഗളൂരു നഗരത്തിന് പുറത്തുപോകാന്‍ പാടില്ലെന്ന ജാമ്യവ്യവസ്ഥയില്‍ ഇളവ് വേണമെന്നും, കേരളത്തിലേക്ക് പോകാന്‍ അനുമതി നല്‍കണമെന്നുമുള്ള പിഡിപി നേതാവ് അബ്ദുല്‍ നാസര്‍ മദനിയുടെ ഹര്‍ജി സുപ്രിംകോടതി തള്ളി. കര്‍ണാടക സര്‍ക്കാരിന്റെ എതിര്‍പ്പിനെ തുടര്‍ന്നാണ് ജസ്റ്റിസ് എസ്. അബ്ദുല്‍ നസീര്‍ അധ്യക്ഷനായ ബെഞ്ചിന്റെ നടപടി.
ബംഗളൂരു സ്‌ഫോടനക്കേസ് വിചാരണഘട്ടത്തിലാണെന്ന് കര്‍ണാടകം കോടതിയെ അറിയിച്ചു. ബംഗളൂരു നഗരത്തിന് പുറത്തുപോകാന്‍ പാടില്ലെന്ന സുപ്രിംകോടതിയുടെ ജാമ്യവ്യവസ്ഥയ്ക്ക് കൃത്യമായ കാരണങ്ങളുണ്ട്. കേരളത്തില്‍ മദനിക്കെതിരെ 24 കേസുകളുണ്ട്. തടങ്കലില്‍ കഴിയുന്ന വ്യക്തിയല്ല. എന്നാല്‍, നിരീക്ഷണത്തിലാണെന്ന് കര്‍ണാടക സര്‍ക്കാര്‍ കോടതിയെ അറിയിച്ചു.
കേരളത്തില്‍ ആയുര്‍വേദ ചികിത്സ നടത്തണം, ബംഗളൂരുവിലെ ഭീമമായ വീട്ടുവാടക തുടങ്ങിയവ ചൂണ്ടിക്കാട്ടിയാണ് അബ്ദുല്‍ നാസര്‍ മദനി ജാമ്യവ്യവസ്ഥയില്‍ ഇളവ് ആവശ്യപ്പെട്ട് സുപ്രിംകോടതിയെ സമീപിച്ചത്.
