കാലെടുത്തു വയ്ക്കുന്നത് അപകടപ്പാതയിലേക്ക് നടവഴികളില്ലാതെ മലപ്പുറം ജില്ലയിലെ വഴികൾ

മലപ്പുറം : നടവഴിയിൽ ദുരിതം നിറഞ്ഞ് മലപ്പുറം. ജില്ലാ ആസ്ഥാനമാണെങ്കിലും കാൽനട യാത്രക്കാർക്ക്‌‌‌‌‌‌‌‌‌ വാഹനങ്ങളെ ഭയക്കാതെ നടക്കാൻ കൃത്യമായ നടപ്പാതയില്ല. സ്ലാബിട്ട ഓടകളാണ് പ്രധാനമായും മലപ്പുറത്തെ നടപ്പാത. കലക്ടറേറ്റ് അടക്കം പ്രധാന സർക്കാർ ഓഫിസുകളെല്ലാം അടങ്ങിയ മലപ്പുറത്ത് ലക്ഷ്യസ്ഥാനത്തെത്താൻ റോഡിലേക്കിറങ്ങേണ്ടി വരും. മലപ്പുറം നഗരസഭയിൽ നിർമിച്ച നടപ്പാതകൾ യാത്രക്കാർക്ക് നടക്കാനുള്ളതല്ല, കച്ചവടത്തിനുള്ളതാണെന്ന് നാട്ടുകാർ പറയും. വാഹന പാർക്കിങ്ങും ഇവിടത്തന്നെ.

മഞ്ചേരി റോഡിലെ ദുരിതം :

മലപ്പുറത്തെ പ്രധാന ടൂറിസം കേന്ദ്രങ്ങളിലൊന്നായ കോട്ടക്കുന്ന് പാർക്ക് കുന്നുമ്മൽ മഞ്ചേരി റോഡിലാണ്. അനിയന്ത്രിതമായ വാഹനത്തിരക്കു കാരണം മഞ്ചേരി റോഡിൽ ഗതാഗത തടസ്സം പതിവാണ്. എന്നാൽ വാഹനം നിർത്തി നടക്കാമെന്ന് വിചാരിച്ചാൽ പാർക്കിങ് സൗകര്യവും ഇല്ല, കുട്ടികളെയും കുടുംബങ്ങളെയും കൂട്ടി മനസ്സറിഞ്ഞു നടക്കാൻ കൃത്യമായ നടപ്പാതയും ഇല്ല. മഞ്ചേരി റോഡിൽ കെഎസ്ആർടിസി ഡിപ്പോ മുതൽ കുന്നുമ്മൽ ബസ്ബേ വരെയുള്ള 50 മീറ്റർ മാത്രം നീളമുള്ള നടപ്പാതയിലൂടെ പകൽ സമയത്തു തടസ്സമില്ലാതെ നടക്കാം. തുടർന്നുള്ള നടത്തത്തിനു റോഡിലേക്കിറങ്ങണം. കോട്ടക്കുന്നിലേക്ക് തിരിയുന്ന റോഡ് കഴിഞ്ഞാൽ മഞ്ചേരി റോഡിൽ നടപ്പാതയില്ല, സ്ലാബിട്ട ഒവുചാലാണുള്ളത്. അതിലാകട്ടെ വാഹന പാർക്കിങ്ങും പരസ്യബോർഡുകളും. ചില ഭാഗങ്ങളിൽ സ്ലാബ് തകർന്നതും യാത്രക്കാർക്ക് ദുരിതമാണ്. ടൗണിൽ കൂടുതൽ കാൽനടയാത്രക്കാർ സഞ്ചരിക്കുന്ന പാതകളിലൊന്നാണ് മ‍ഞ്ചേരി റോഡ്. കോട്ടക്കുന്ന് ടൂറിസം പാർക്ക്, ടൗൺ ഹാൾ, സഹകരണ ആശുപത്രി, സപ്ലൈകോ മാർക്കറ്റ്, മസ്ജിദ് എന്നിവിടങ്ങളിലേക്ക് പോകുന്നവർ ഈ പാതയാണു ഉപയോഗിക്കുന്നത്.