പെൺകുട്ടികളെ ഇൻസ്റ്റഗ്രാം വഴി പരിചയപ്പെട്ട് നഗ്നഫോട്ടോ ചമച്ച് ഭീഷണി: രണ്ടുപേർ അറസ്റ്റിൽ.
ഗുരുവായൂർ: പ്രായപൂർത്തിയാകാത്ത പെൺകുട്ടികളെ സാമൂഹമാധ്യമങ്ങൾ വഴി പരിചയപ്പെട്ട് പ്രണയം നടിച്ച് നഗ്ന ഫോട്ടോകൾ ചമച്ച് ഭീഷണിപ്പെടുത്തിയ കേസിൽ രണ്ടുപേർ അറസ്റ്റിൽ. മലപ്പുറം മുണ്ടപറമ്പ് സ്വദേശികളായ കണ്ണമംഗലത്ത് മുഹമ്മദാലി (25), തരുവൻകോടൻ ആരാൻകുഴി ഇർഷാദ് (അൽഅമീൻ -19) എന്നിവരെയാണ് ഗുരുവായൂർ പൊലീസ് അറസ്റ്റ് ചെയ്തത്.പ്ലസ് വൺ വിദ്യാർഥിനി ചൈൽഡ് വെൽഫെയർ സമിതിക്ക് നൽകിയ പരാതി പൊലീസിന് കൈമാറുകയായിരുന്നു.
പരാതിക്കാരിയെ ഇൻസ്റ്റഗ്രാം വഴി പരിചയപ്പെട്ട് വിഡിയോ കോൾ ചെയ്ത് സ്ക്രീൻ ഷോട്ടെടുത്ത് മോർഫ് ചെയ്ത് ഭീഷണിപ്പെടുത്തുകയായിരുന്നു. വിഡിയോ കോളിലൂടെ ശരീരം പ്രദർശിപ്പിച്ചില്ലെങ്കിൽ വ്യാജ ചിത്രങ്ങൾ സമൂഹമാധ്യമങ്ങളിലൂടെ പ്രചരിപ്പിക്കുമെന്നായിരുന്നു ഭീഷണി.
പ്രതികളുടെ ഫോൺ പരിശോധിച്ചതിൽ നിന്ന് വേറെയും പെൺകുട്ടികളെ ഇത്തരത്തിൽ ഭീഷണിപ്പെടുത്തിയതായി വ്യക്തമായെന്ന് പൊലീസ് പറഞ്ഞു. എച്ച്.എച്ച്.ഒ പി.കെ. മനോജ്കുമാർ, എസ്.ഐ കെ.ജി. ജയപ്രദീപ്, എ.എസ്.ഐമാരായ എം.ആർ. സജീവ്, കെ.ബി. ജലീൽ എന്നിവർ ചേർന്നാണ് പ്രതികളെ അറസ്റ്റ് ചെയ്തത്.
