ആയുർഗ്രീൻ ഹോസ്പിറ്റലിന്റെ ‘ഞാറുനടീൽ മഹോത്സവം’ ശ്രദ്ധേയമായി; വിദേശികളും ഞാറു നട്ടു:
എടപ്പാൾ: കാർഷിക പാരമ്പര്യത്തിന്റെ പ്രസക്തി വിളിച്ചോതിയും പ്രകൃതിസൗഹൃദ ജീവിതശൈലി പ്രോത്സാഹിപ്പിച്ചും ആയുർഗ്രീൻ ഹോസ്പിറ്റൽ (Ayurgreen Hospital) സംഘടിപ്പിച്ച ‘ഞാറുനടീൽ മഹോത്സവം’ വേറിട്ട അനുഭവമായി. 2025 ഡിസംബർ 29-ന് രാവിലെ 9 മണിക്ക് ഹോസ്പിറ്റലിന് സമീപമുള്ള പാടശേഖരത്തിൽ നടന്ന ചടങ്ങിൽ പ്രാദേശിക ജനപ്രതിനിധികളും വിദേശത്തുനിന്ന് ചികിത്സയ്ക്കായി എത്തിയവരും പങ്കെടുത്തു.
കാലടി ഗ്രാമപഞ്ചായത്ത് പ്രസിഡന്റ് ശ്രീമതി മുബഷിറ സിറാജ് ചടങ്ങ് ഉദ്ഘാടനം ചെയ്തു. ആധുനിക ജീവിതശൈലിയിൽ ആരോഗ്യകരമായ ഭക്ഷണരീതിയുടെയും കാർഷിക സംസ്കാരത്തിന്റെയും പ്രാധാന്യത്തെക്കുറിച്ച് അവർ സംസാരിച്ചു. ആയുർഗ്രീൻ ഹോസ്പിറ്റലിലെ ചികിത്സയുടെ ഭാഗമായി വിദേശത്തുനിന്നും എത്തിയ വിശിഷ്ട വ്യക്തികളായ കുവൈറ്റിൽ നിന്നുള്ള ശ്രീ അലി എം. അഹമ്മദ്, ഒമാനിൽ നിന്നുള്ള ശ്രീ ഖാലിദ് ഹിലാൽ ശര്യാണി, യു.എ.ഇ-യിൽ നിന്നുള്ള ശ്രീ അഹമ്മദ് ഹസൻ അക്ഷഹി എന്നിവർ ചടങ്ങിൽ പ്രത്യേക അതിഥികളായി സംബന്ധിക്കുകയും ആശംസകൾ നേരുകയും ചെയ്തു.
ബ്ലോക്ക് മെമ്പർ ശ്രീ ടി.പി. ജിജിത്ത്, അഗ്രിക്കൾച്ചറൽ ഓഫീസർ ശ്രീ സലീം എന്നിവർ മുഖ്യാതിഥികളായിരുന്നു. ആയുർഗ്രീൻ എം.ഡി. ഡോ. സക്കറിയ, മെഡിക്കൽ ഡയറക്ടർ ഡോ. ഹബീബുള്ള, ചെയർമാൻ ശ്രീ ഹിഫ്സുറഹ്മാൻ, ഡയറക്ടർമാരായ ശ്രീ സിദ്ദിഖ്, ശ്രീ തൽഹത്ത് എന്നിവരും കാലടി ഗ്രാമപഞ്ചായത്ത് മെമ്പർമാരായ ശ്രീമതി ശോഭന ബാബു, ശ്രീമതി സുലൈഖ കെ.പി., ശ്രീമതി നൂർജഹാൻ, ശ്രീമതി സുകന്യ പനയ്ക്കൽ, ശ്രീ നബീൽ, ശ്രീമതി ഷീജ, ശ്രീമതി സന്ധ്യ ടീച്ചർ എന്നിവരും ആശംസകൾ അർപ്പിച്ചു.
ഹോസ്പിറ്റലിൽ ചികിത്സക്കെത്തിയ വിദേശികളും സ്വദേശികളായ രോഗികളും ജീവനക്കാരും നാട്ടുകാരും ഒത്തുചേർന്ന് പാടത്തിറങ്ങി ഞാറുനട്ടത് ഏറെ കൗതുകകരവും ആവേശകരവുമായ കാഴ്ചയായി. ‘പച്ചപ്പിന്റെ സന്തോഷം പങ്കിടാം’ എന്ന പ്രമേയത്തിലൂടെ പ്രകൃതിയുമായുള്ള ഇഴയടുപ്പം ഊട്ടിയുറപ്പിക്കാൻ ലക്ഷ്യമിട്ടുള്ള ഈ കാർഷിക സംരംഭം പുതിയൊരു അവബോധം സൃഷ്ടിച്ചാണ് സമാപിച്ചത്.
