മുംബൈ: (KVARTHA) ഇന്ത്യൻ പ്രീമിയർ ലീഗ് (ഐപിഎല്) ക്രിക്കറ്റ് മത്സരങ്ങള്‍ പൂർണമായും സൗജന്യമായി കാണാനുള്ള അവസരം അവസാനിക്കുന്നുവോ?റിലയൻസ്-ഡിസ്നി കൂട്ടുകെട്ട് പുതിയ പദ്ധതികളുമായി രംഗത്ത് വരുന്നതായാണ് റിപ്പോർട്ടുകള്‍ സൂചിപ്പിക്കുന്നത്. സൗജന്യ സ്ട്രീമിംഗ് ഒരു പരിധി വരെ മാത്രം നല്‍കി, പിന്നീട് പണം നല്‍കി സബ്‌സ്‌ക്രിപ്‌ഷൻ എടുക്കേണ്ടി വരുന്ന രീതിയിലേക്ക് കാര്യങ്ങള്‍ മാറാൻ സാധ്യതയുണ്ടെന്നാണ് സൂചന.
റിലയൻസ്-ഡിസ്നി കൂട്ടുകെട്ടിന്റെ ലയനം
കഴിഞ്ഞ വർഷം മുകേഷ് അംബാനിയുടെ റിലയൻസും വാള്‍ട്ട് ഡിസ്‌നിയും തങ്ങളുടെ ഇന്ത്യയിലെ മാധ്യമ ആസ്തികള്‍ ലയിപ്പിച്ച്‌ ഒരു പുതിയ സംയുക്ത സംരംഭത്തിന് രൂപം നല്‍കിയിരുന്നു. 8.5 ബില്യണ്‍ ഡോളറിൻ്റെ വലിയ ഇടപാടാണ് ഇതിന് പിന്നില്‍ നടന്നത്
ഈ ലയനത്തിന് ശേഷമാണ് ഐപിഎല് സ്ട്രീമിംഗില്‍ പുതിയ മാറ്റങ്ങള്‍ വരുന്നത്.
പുതിയ ഹൈബ്രിഡ് മോഡലുമായി റിലയൻസ്-ഡിസ്നി
റോയിട്ടേഴ്‌സ് റിപ്പോർട്ടുകള്‍ പ്രകാരം, റിലയൻസ്-ഡിസ്നി സംയുക്ത സംരംഭം ഒരു ഹൈബ്രിഡ് മോഡല്‍ അവതരിപ്പിക്കാനാണ് പദ്ധതിയിടുന്നത്. ഇതനുസരിച്ച്‌, ഒരുപരിധി വരെ ഐപിഎല് മത്സരങ്ങള്‍ സൗജന്യമായി കാണാൻ അനുവദിക്കും. അതിനുശേഷം, ഉപഭോക്താക്കളുടെ ഉപയോഗ രീതി അനുസരിച്ച്‌ സബ്‌സ്‌ക്രിപ്‌ഷനുകള്‍ എടുക്കേണ്ടിവരും. 149 രൂപ മുതലായിരിക്കും സബ്‌സ്‌ക്രിപ്‌ഷൻ പ്ലാനുകള്‍ എന്നാണ് സൂചന.
ജിയോ സിനിമയുടെ പുതിയ നീക്കം
2023 മുതല്‍ അഞ്ച് വർഷത്തേക്ക് മൂന്ന് ബില്യണ്‍ ഡോളറിനാണ് ജിയോ സിനിമ ഐപിഎല് സംപ്രേഷണ അവകാശം നേടിയത്. ജിയോ സിനിമ ആരംഭം മുതല്‍ സൗജന്യ ഐപിഎല് സ്ട്രീമിംഗ് ആണ് നല്‍കി വരുന്നത്. എന്നാല്‍, പുതിയ റിപ്പോർട്ടുകള്‍ പ്രകാരം ഐപിഎല് മാത്രമല്ല, എല്ലാ സ്ട്രീമിംഗ് ഉള്ളടക്കവും ഈ ഹൈബ്രിഡ് മോഡലിലേക്ക് മാറ്റാൻ പദ്ധതിയുണ്ട്.
ക്രിക്കറ്റ് പ്രേമികള്‍ക്ക് തിരിച്ചടി
സൗജന്യ ഐപിഎല് സ്ട്രീമിംഗ് അവസാനിക്കുന്നത് ക്രിക്കറ്റ് പ്രേമികള്‍ക്ക് വലിയൊരു തിരിച്ചടിയായിരിക്കും. എന്നാല്‍, പുതിയ ഹൈബ്രിഡ് മോഡല്‍ എങ്ങനെയായിരിക്കും എന്നതിനെക്കുറിച്ച്‌ കൂടുതല്‍ വിവരങ്ങള്‍ പുറത്തുവരേണ്ടതുണ്ട്.
