ഈ അധ്യാപകൻ പഠിത്തം നിർത്തുന്നില്ല! ആജീവനാന്തം പഠിക്കുന്നവർ കൂടിയായിരിക്കണം അധ്യാപകർ
പൊന്നാനീ: വിരമിക്കും വരെ പഠിപ്പിക്കൽ മാത്രമല്ല, ആജീവനാന്തം പഠിക്കുന്നവർ കൂടിയായിരിക്കണം അധ്യാപകർ. പൊന്നാനിയിലെ ടി.വി.അബ്ദുറഹിമാൻകുട്ടി മാഷെപ്പോലെ. 2005ൽ അധ്യാപനത്തോട് വിട ചൊല്ലിയശേഷം ടി.വി.അബ്ദുറഹിമാൻകുട്ടി തന്റെ പൂർണ സമയവും നീക്കി വച്ചത് പൊന്നാനിയുടെ ചരിത്രം പഠിക്കാനാണ്. ചരിത്രമുറങ്ങുന്ന പൊന്നാനി, മലബാറിലെ മക്ക, പൊന്നാനി; പൈതൃകവും നവോത്ഥാനവും, പൊന്നാനിപ്പാട്ടുകൾ, ഗുരുവായൂർ സത്യഗ്രഹം : ഒരു പുനർവായന എന്നിങ്ങനെ എണ്ണം പറഞ്ഞ ചരിത്രഗ്രന്ഥങ്ങൾ ഇതിനകം അദ്ദേഹം മലയാളത്തിനു സമ്മാനിച്ചു. പൊന്നാനിയിലെ പത്തേമാരികളെക്കുറിച്ചാണ് അബ്ദുറഹിമാൻ മാഷുടെ ഇപ്പോഴത്തെ പഠനം.
ഒരുകാലത്ത് നൂറോളം പത്തേമാരികളുടെ ഉടമകളായിരുന്നു പൊന്നാനിക്കാർ എന്ന് അദ്ദേഹം പറയുന്നു. പത്തേമാരി തൊഴിലാളികളായിരുന്നവരെ നേരിട്ടുകണ്ട് കാര്യങ്ങൾ മനസ്സിലാക്കി അതെക്കുറിച്ച് ഒരു പുസ്തകമിറക്കാനാണ് ഈ എഴുപത്തിനാലാം വയസ്സിലും അബ്ദുറഹിമാൻകുട്ടി മാഷുടെ നെട്ടോട്ടം. ഇതിനകം തന്നെ അറുപതിലധികം പേരെ നേരിട്ടു കണ്ടുകഴിഞ്ഞു. പുസ്തകരചനയും അവസാനഘട്ടത്തിലാണ്.
ചെറുപ്പം മുതലേ വായനാശീലമുള്ള അബ്ദുറഹിമാൻ കുട്ടി മാഷുടെ പ്രാദേശിക ചരിത്രരചനയിലേക്കുള്ള വഴികാട്ടി ഫാറൂഖ് കോളജ് സാമ്പത്തികശാസ്ത്രം മുൻ മേധാവിയും ചന്ദ്രിക മുൻ പത്രാധിപരുമായിരുന്ന പ്രഫ.കെ.വി.അബ്ദുറഹിമാൻ പൊന്നാനിയാണ്. ആദ്യ രചനയായ ചരിത്രമുറങ്ങുന്ന പൊന്നാനി ഉൾപ്പെടെ 15 പുസ്തകങ്ങൾ അബ്ദുറഹിമാൻ കുട്ടി മാഷ് രചിച്ചിട്ടുണ്ട്. പത്തൊൻപതാം വയസ്സിൽ പട്ടാമ്പി മുതുതല വിവേകോദയം യുപി സ്കൂളിൽ അറബിക് അധ്യാപകനായി കയറിയ ടി.വി.അബ്ദുറഹിമാൻകുട്ടി 2005ൽ പൊന്നാനി ടിഐ യുപി സ്കൂളിൽ നിന്നാണ് വിരമിക്കുന്നത്. 17 വർഷം പൊന്നാനി നഗരസഭാ കൗൺസിലറുമായിരുന്നു.പൊതുവേ, നമുക്ക് ഏറ്റവും കുറച്ചറിവുണ്ടാവുക സ്വന്തം നാടിനെക്കുറിച്ചായിരിക്കും. കണ്ടു കണ്ട് കൗതുകം നഷ്ടപ്പെടുന്നതായിരിക്കാം കാരണം.
പക്ഷേ, സ്വന്തം നാടായ പൊന്നാനിയോടുള്ള കൗതുകവും മുഹബത്തും അബ്ദുറഹിമാൻകുട്ടി മാഷിന് ഇനിയും അവസാനിച്ചിട്ടില്ല. പ്രാദേശിക ചരിത്ര രചനയുടെ ആഴവും പരപ്പും അതു രേഖപ്പെടുത്തി വയ്ക്കേണ്ടതിന്റെ ആവശ്യവും അദ്ദേഹത്തിന്റെ ഓരോ കൃതിയും നമുക്കു കാട്ടിത്തരുന്നു.പൊന്നാനി നഗരസഭയിലെ 42 ജുമാമസ്ജിദുകൾ, 45 നിസ്കാരപ്പള്ളികൾ, ക്ഷേത്രങ്ങൾ, പ്രധാന കുടുംബങ്ങൾ, വിദ്യാഭ്യാസ സ്ഥാപനങ്ങൾ എന്നിവയുടെയെല്ലാം ചരിത്രം അദ്ദേഹത്തിന്റെ പക്കലുണ്ട്. പൊന്നാനിയിൽ വച്ച് പാന്റ്സും വെള്ള ഷർട്ടും തലയിലൊരു ഗോൾഫ് ഹാറ്റും വച്ച് അബ്ദുറഹിമാൻകുട്ടി മാഷെ കാണുകയാണെങ്കിൽ സലാം പറയാൻ മറക്കേണ്ട. പൊന്നാനി അറിവുകളുടെ പത്തേമാരിയാണ് ആ പോകുന്നത്.
ponnaninews
