India
ഒറ്റവര്ഷം 3.35 ലക്ഷം കോടി രൂപ; ഇന്ധന വിലവര്ധനവ് വഴി കേന്ദ്രസര്ക്കാരിന് ലഭിച്ചത് 88 ശതമാനം അധികവരുമാനം
ന്യൂദല്ഹി: ഇന്ധന വിലവര്ധനവ് വഴി കേന്ദ്രസര്ക്കാരിന് ലഭിച്ചത് 88 ശതമാനം അധികവരുമാനം. ലോക്സഭയില് പെട്രോളിയം, പ്രകൃതിവാതക സഹമന്ത്രി രാമേശ്വര് തേലിയാണ് ഇക്കാര്യം വ്യക്തമാക്കിയത്.
ഇക്കഴിഞ്ഞ സാമ്പത്തിക വര്ഷത്തില് 3.35 ലക്ഷം കോടി രൂപയാണ് ഇന്ധനനികുതി വര്ധനവിലൂടെ കേന്ദ്രസര്ക്കാരിന് ലഭിച്ചത്. പെട്രോളിന്റെ എക്സൈസ് തീരുവ കഴിഞ്ഞ വര്ഷം 19.98 ല് നിന്ന് 32.9 യിലേക്കാണ് വര്ധിപ്പിച്ചത്.
ഡീസലിനാകട്ടെ ഇത് 15.83 ല് നിന്ന് 31.8 രൂപയാക്കി. ഇതാണ് കേന്ദ്രസര്ക്കാരിന് റെക്കോഡ് വരുമാനം കൊണ്ടുവന്നത്.
പെട്രോള്, ഡീസല്, ഏവിയേഷന് ടര്ബൈന് ഫ്യുവല്, പ്രകൃതിവാതകം എന്നിവ ഉള്പ്പെടെയുള്ളവയില് നിന്നുള്ള വരുമാനമാണിത്.
2014ല് മോദി സര്ക്കാര് അധികാരത്തിലെത്തുമ്പോള് പെട്രോളിന് 9.48 രൂപയും ഡീസലിന് 3.56 രൂപയുമായിരുന്നു നികുതി.
