സർവകാല റെക്കോർഡുകൾ മറികടന്ന് സപ്ലൈകോയുടെ ഓണംവിപണി; ഇതുവരെ നടത്തിയത് 383.12 കോടി രൂപയുടെ വിൽപന
തിരുവനന്തപുരം: സർവകാല റെക്കോർഡുകൾ മറികടന്ന് സപ്ലൈകോയുടെ ഓണംവിപണി. 383.12 കോടി രൂപയുടെ വില്പന നടത്തി. 56.50 ലക്ഷം ഉപഭോക്താക്കളാണ് ഇതുവരെ സപ്ലൈകോ വില്പന ശാലകള് സന്ദർശിച്ചത്. 180 കോടി രൂപ സബ്സിഡി സാധനങ്ങളുടെ വില്പനയിലൂടെയാണ്. കേരളത്തിലെ 2.25 കോടിയോളം ജനങ്ങള്ക്ക് നേരിട്ട് ഇതിന്റെ പ്രയോജനം ലഭിച്ചു. ആഗസ്റ്റ് 27ന് സപ്ലൈകോയുടെ പ്രതിദിന വിറ്റുവരവ് അതിനു മുമ്പുള്ള ഏറ്റവും വലിയ പ്രതിദിന വിറ്റുവരവായ 15.37 കോടിയെ ഭേദിച്ച് 15.7 കോടിയിലെത്തി.
ആഗസ്റ്റ് അവസാനവാരം തൊട്ട് പ്രതിദിന വില്പന ഓരോ ദിവസവും റെക്കോര്ഡായിരുന്നു. ആഗസ്റ്റ് 29ന് ഈ റെക്കോര്ഡ് ഭേദിച്ച് 17.91 കോടിയും 30ന് 19.4 കോടിയും സെപ്തംബര് ഒന്നിന് 22.2 കോടിയും രണ്ടിന് 24.99 കോടിയും മൂന്നിന് 24.22 കോടിയും കടന്നു. അരിയുടെയും വെളിച്ചെണ്ണയുടെയും ലഭ്യത ഉറപ്പുവരുത്തിക്കൊണ്ട് വിലക്കയറ്റത്തിനുള്ള സാധ്യത ഫലപ്രദമായി തടഞ്ഞുവെന്നും സപ്ലൈകോ വാര്ത്താക്കുറിപ്പില് പറഞ്ഞു.
ബുധനാഴ്ച വരെ സപ്ലൈകോ വഴി 1.19 ലക്ഷം ക്വിന്റല് അരി വിറ്റതിലൂടെ 37.03 കോടി രൂപയുടെയും 20.13 ലക്ഷം ലിറ്റര് ശബരി വെളിച്ചെണ്ണ വില്പനയിലൂടെ 68.96 കോടി രൂപയുടെയും 1.11 ലക്ഷം ലിറ്റര് കേര വെളിച്ചെണ്ണ വില്പനയിലൂടെ 4.95 കോടി രൂപയുടെ വിറ്റുവരവുണ്ടായി. ജില്ലാ ഫെയറുകളില് 4.74 കോടി രൂപയുടെ വില്പന നടന്നു. നിയോജക മണ്ഡല ഫെയറുകളില് 14.41 കോടി രൂപയുടെ വില്പന നടന്നു.
