സോപാനം സ്കൂൾ ഓഫ് പഞ്ചവാദ്യത്തിന്റെ നേതൃത്വത്തിൽ മലേഷ്യയിൽ പഞ്ചാരി മേളം അരങ്ങേറ്റം
കേരളത്തിന്റെ തനത് താളവാദ്യ കലയായ പഞ്ചാരി മേളം, മലേഷ്യൻ മണ്ണിൽ ചരിത്രം കുറിക്കുന്നു. പ്രശസ്തമായ സോപാനം സ്കൂൾ ഓഫ് പഞ്ചവാദ്യത്തിന്റെ വിദേശ ശാഖയായി പ്രവർത്തിക്കുന്ന രാംദർശൻ മ്യൂസിക് അക്കാദമിയുടെ വിദ്യാർത്ഥികൾ അണിനിരക്കുന്ന, മലേഷ്യയിലെ ആദ്യത്തെയും ഏറ്റവും വലിയതുമായ പഞ്ചാരി മേളം അരങ്ങേറ്റമായ ‘താളം’ ഡിസംബർ 14-ന് മലേഷ്യയിലെ ജോഹോർ ജയ ഹാളിൽ അരങ്ങേറും
സംഗീതത്തിന് അതിരുകളില്ലെന്ന് ഒരിക്കൽക്കൂടി തെളിയിക്കുന്ന ഈ പരിപാടി, രാംദർശൻ മ്യൂസിക് അക്കാദമിയുടെ സ്ഥാപകനും ഡയറക്ടറുമായ സായി
ദർശന്റെ ദീർഘവീക്ഷണത്തിന്റെ ഫലമാണ്.
കേരളത്തിലെ സോപാനം സ്കൂൾ ഓഫ് പഞ്ചവാദ്യത്തിൽ നിന്നാണ് അദ്ദേഹം ചെണ്ട മേളം അഭ്യസിച്ചത്.
മലേഷ്യയിലെ ജോഹോറിൽ, സോപാനം സ്കൂൾ ഓഫ് പഞ്ചവാദ്യത്തിന്റെ ഔദ്യോഗിക സിലബസ് അനുസരിച്ച് ആശാന്മാരായ ശ്രീ. മുരളി കണ്ടനകം, ശ്രീ. സന്തോഷ്‌ ആലംകോട് എന്നിവരുടെ നേതൃത്വത്തിലും ശ്രീ. സായ് ദർശന്റെ മേൽനോട്ടത്തിലും 9 വയസ്സിനും 30 വയസ്സിനും ഇടയിൽ പ്രായമുള്ള 40-ൽ അധികം വിദ്യാർത്ഥികൾ ഒന്നര വർഷത്തെ തീവ്ര പരിശീലനം വിജയകരമായി പൂർത്തിയാക്കി അരങ്ങേറ്റത്തിന് തയ്യാറെടുക്കുന്നു. ഈ അരങ്ങേറ്റത്തിന് കേരളത്തിൽ നിന്നുള്ള സോപനത്തിലെ 12 കലാകാരന്മാർ പങ്കെടുക്കുന്നുണ്ട്.
കേരളത്തിലെ ഒരു കലാരൂപത്തിന്റെ രാജ്യാന്തര വളർച്ചയുടെയും, ഗുരു-ശിഷ്യ ബന്ധത്തിന്റെ ശക്തിയുടെയും, സാംസ്കാരിക കൈമാറ്റത്തിന്റെയും മഹത്തായ ഉദാഹരണമാണ് സോപാനം സ്കൂൾ ഓഫ് പഞ്ചവാദ്യത്തിന്റെ മലേഷ്യൻ ശാഖയുടെ ഈ അരങ്ങേറ്റം.
