വായനയും എഴുത്തും ഗണിതവും: എം.ഐ. ട്രെയിനിംഗ് കോളേജിൽ ബ്രിഡ്ജിംഗ് കോഴ്സ് സമാപിച്ചു
പൊന്നാനി: എം.ഐ. ട്രെയിനിംഗ് കോളേജ്, പൊന്നാനിയിലെ എൻഎസ്എസ് യൂണിറ്റും സിൽ ഇന്ത്യ ഫൗണ്ടേഷനും സംയുക്തമായി സംഘടിപ്പിച്ച ബ്രിഡ്ജിംഗ് കോഴ്സിന്റെ സമാപന സമ്മേളനം കോളേജ് ക്യാമ്പസിൽ ഉത്സാഹപൂർണ്ണമായി നടന്നു. വായന, എഴുത്ത്, അടിസ്ഥാന ഗണിതം തുടങ്ങിയ വിഷയങ്ങളിൽ പ്രാവീണ്യം കുറവുള്ള സമീപ ഗ്രാമങ്ങളിലെ വിദ്യാർത്ഥികളെ ശക്തിപ്പെടുത്തുക എന്നതാണ് പദ്ധതിയുടെ ലക്ഷ്യം.
വിവിധ സ്കൂളുകളിൽ രണ്ട് മുതൽ ഒൻപത് വരെയുള്ള ക്ലാസ്സുകളിൽ പഠിക്കുന്ന 50 വിദ്യാർത്ഥികൾ ഈ വേനൽക്കാല ക്ളാസുകളിൽ പങ്കെടുത്തു. എം.ഐ. ട്രെയിനിംഗ് കോളേജിലെ അധ്യാപക വിദ്യാർത്ഥികളായ എൻഎസ്എസ് സന്നദ്ധപ്രവർത്തകരും സിൽ ഇന്ത്യ ഫൗണ്ടേഷനിൽ നിന്നുള്ള വിദഗ്ധ ട്രെയിനർമാരും ചേർന്നാണ് പരിശീലനം നൽകിയത്.
സമാപന സമ്മേളനത്തിൽ കോളജ് പ്രിൻസിപ്പാൾ ഡോ. നസീറലി എം.കെ. അധ്യക്ഷത വഹിച്ചു. സാമൂഹിക ഉന്നമനത്തിന് വിദ്യാഭ്യാസ സ്ഥാപനങ്ങൾ മാനവ വിഭവശേഷിയും അക്കാദമിക ശക്തിയും സമർപ്പിക്കണം എന്ന് അദ്ദേഹം പറഞ്ഞു.
പൊന്നാനി മുനിസിപ്പാലിറ്റിയിലെ വെൽഫെയർ സ്റ്റാൻഡിംഗ് കമ്മിറ്റി ചെയർമാൻ ശ്രീ. രാജേഷ് ഊപ്പാല ചടങ്ങിൽ സമാപന പ്രഭാഷണം നടത്തി. സർക്കാരും പൊതു സംവിധാനങ്ങളും സന്നദ്ധസംഘടനകളും ചേർന്നുള്ള പ്രവർത്തനങ്ങൾക്കേ സാമൂഹിക പരിഷ്കരണം നടപ്പിലാക്കാൻ കഴിയൂ എന്ന് അദ്ദേഹം ചൂണ്ടിക്കാണിച്ചു.
ചൈൽഡ് വെൽഫെയർ കമ്മിറ്റി ചെയർമാൻ അഡ്വ. സുരേഷ് ചടങ്ങിന് പ്രധാന അതിഥിയായിരുന്നു. വിദ്യാർത്ഥികളുടെ അടിസ്ഥാന വിദ്യാഭ്യാസം ഉറപ്പാക്കുന്നത് സമൂഹത്തിന്റെ ഉത്തരവാദിത്തമാണെന്ന് അദ്ദേഹം പറഞ്ഞു. അധ്യാപകരാണ് സമൂഹപരിവർത്തനത്തിന് വഴികാട്ടികളെന്ന് മുനിസിപ്പൽ കൗൺസിലർ ഫർഹാൻ ബിയ്യം അഭിപ്രായപ്പെട്ടു.
സിൽ ഡയറക്ടർ പി.ടി. ഷിഹാബ്, എൻഎസ്എസ് പ്രോഗ്രാം ഓഫീസർ ശ്രീ. അമീൻ ഫാറൂക്ക്, എൻഎസ്എസ് കോഓർഡിനേറ്റർ നന്ദന എം, റിസോഴ്സ് പേഴ്സൺമാരായ കബീർ, നിയാസ് എന്നിവർ അനുഭവങ്ങൾ പങ്കുവെച്ചു.
വിദ്യാർത്ഥികൾക്കായുള്ള പതിവ് പിന്തുണ തുടർന്നുള്ള അക്കാദമിക് വർഷത്തിലും തുടരും എന്ന തീരുമാനം പരിപാടിയിൽ പ്രഖ്യാപിച്ചു. വിദ്യാർത്ഥികളും രക്ഷിതാക്കളും അനുഭവങ്ങൾ പങ്കുവെച്ചു. വിദ്യാർത്ഥികളുടെ കലാപരിപാടികളോടെ ചടങ്ങ് സമാപിച്ചു.
