പൊന്നാനി നഗരസഭയുടെ ഹരിതകർമസേനാംഗങ്ങൾക്ക് 5000 രൂപ വിഷുക്കൈനീട്ടം നൽകും

പൊന്നാനി: വീടുകൾതോറും കയറിയിറങ്ങി മാലിന്യം ശേഖരിക്കുന്ന ഹരിതകർമസേനാംഗങ്ങൾക്ക് ഇത്തവണത്തെ വിഷു ആഹ്ലാദഭരിതമാകും. നഗരസഭയുടെ ഹരിതകർമസേനാംഗങ്ങൾക്ക് 5000 രൂപ വിഷുക്കൈനീട്ടം നൽകും.

വിടുകളിൽനിന്നും സ്ഥാപനങ്ങളിൽനിന്നും സ്ഥിരമായി പ്ലാസ്റ്റിക് ഉൾപ്പെടെയുള്ള മാലിന്യങ്ങളുടെ ശേഖരണം കാര്യക്ഷമമാക്കിയതോടെ പ്ലാസ്റ്റിക് കവറുകളിൽ നിറച്ച് ഭക്ഷണാവശിഷ്ടങ്ങൾ പൊതു ഇടങ്ങളിലും ജലാശയങ്ങളിലും വലിച്ചെറിയുന്ന പ്രവണത കുറഞ്ഞിട്ടുണ്ട്.

വീടും നാടും പരിസരവും ശുചിത്വത്തോടെ പരിപാലിക്കുന്നതിൽ ഹരിതകർമസേന വഹിക്കുന്ന പങ്ക് നിർണായകവും സ്തുത്യഹർഹവുമാണെന്ന് ഭരണസമിതി വിലയിരുത്തി. അത്തരം ഇടപെടലുകൾകൂടി കണക്കിലെടുത്താണ് ഇത്തവണ 5000 രൂപവീതം വിഷുക്കൈനീട്ടം നൽകാൻ തീരുമാനിച്ചത്.

നഗരസഭാധ്യക്ഷൻ ശിവദാസ് ആറ്റുപുറം വിതരണോദ്ഘാടനം നിർവഹിച്ചു. ഉപാധ്യക്ഷ ബിന്ദു സിദ്ധാർഥൻ അധ്യക്ഷതവഹിച്ചു. സ്ഥിരംസമിതി അധ്യക്ഷരായ രജീഷ് ഊപ്പാല, ഷീന സുദേശൻ, ഐആർടിസി കോഡിനേറ്റർ നിഖിൽ, സെക്രട്ടറി സജിറൂൺ എന്നിവർ പ്രസംഗിച്ചു.