പുതിയ കാറിൻ്റെ സ്പീഡോമീറ്റര് വിച്ഛേദിച്ച നിലയിൽ, ടിസിആറും ഇല്ല; ഒരു ലക്ഷം രൂപ പിഴയിട്ട് എംവിഡി
കോട്ടക്കൽ: സ്പീഡോമീറ്റർ വിച്ഛേദിച്ച് റോഡിൽ ഇറക്കിയ കാർ മോട്ടോർ വാഹന വകുപ്പ് പിടികൂടി. ബുധനാഴ്ച തിരൂരിൽ നിന്നും പെരിന്തൽമണ്ണയിലേക്ക് പോകുന്നതിനിടെ കോട്ടക്കലിൽ വെച്ചാണ് ഡീലർ വാഹനം മോട്ടോർ വാഹന വകുപ്പ് ഉദ്യോഗസ്ഥർ പിടികൂടിയത്. ഡീലർ വാഹനം നിരത്തിൽ ഇറക്കുമ്പോൾ വേണ്ട രേഖകൾ ഒന്നും കാറിൽ ഉണ്ടായിരുന്നില്ല. പതിവ് വാഹന പരിശോധനയ്ക്കിടെയാണ് നിയമലംഘനം നടത്തിയ കാർ മോട്ടോർ വാഹന വകുപ്പിന്റെ ശ്രദ്ധയിൽപ്പെട്ടത്.
ടിസിആർ (ട്രേഡ് സർട്ടിഫിക്കറ്റ് ഓഫ് രജിസ്ട്രേഷൻ) ഇല്ലാതെയാണ് വാഹനം നിരത്തിൽ ഇറക്കിയിരുന്നത്. ഒറിജിനൽ ടിസിആർ സർട്ടിഫിക്കറ്റ് ഇല്ലാതെ വാഹനം ഷോറൂമിൽ നിന്ന് മറ്റൊരു ഷോറൂമിലേക്ക് മാറ്റാൻ പാടില്ലെന്നാണ് ചട്ടം. വിശദ പരിശോധനയിലാണ് വാഹനത്തിന്റെ സ്പീഡോമീറ്റർ വിച്ഛേദിച്ചതായും കണ്ടെത്തിയത്. സ്പീഡോമീറ്റർ പ്രവർത്തിക്കാതിരിക്കാനായി ക്ലസ്റ്റർ മീറ്ററിലെ ഫ്യൂസ് അഴിച്ചുമാറ്റിയ നിലയിലായിരുന്നു. ഇതുകാരണം, വാഹനം എത്ര കിലോമീറ്റർ ഓടിയാലും സ്പീഡോമീറ്ററിൽ കിലോമീറ്റർ കൂടുകയില്ല. ഇത്തരത്തിലുള്ള വാഹനങ്ങൾ ഡീലർമാരുടെ വ്യക്തിഗത ആവശ്യങ്ങൾക്കും ടെസ്റ്റ് ഡ്രൈവുകൾക്കും ഉപയോഗിച്ച് പുതിയ വാഹനം വാങ്ങിക്കുന്ന ഉപഭോക്താവ് അറിയാതെ വിൽക്കുകയാണ് പതിവ്.
കാർ തിരൂരിലെ ഷോ റൂമിൽ നിന്നും പെരിന്തൽമണ്ണയിലെ ഷോ റൂമിലേക്കു കൊണ്ടുപോകുകയായിരുന്നുവെന്ന് വാഹനത്തിൽ ഉണ്ടായിരുന്നവർ പറയുന്നു. സംഭവത്തിൽ മോട്ടോർ വാഹന വകുപ്പിലെ 182 എ പ്രകാരം വാഹനത്തിൻ്റെ ഡീലർക്ക് ഒരു ലക്ഷം രൂപ പിഴ ചുമത്തി.
എൻഫോഴ്സ്മെന്റ് ആർടിഒ എസ് പ്രദീപിന്റെ നിർദേശപ്രകാരം എംവിഐ സജി തോമസ്, എഎംവിഐമാരായ ഷൂജ മാട്ടട, ഷബീർ പാക്കാടൻ എന്നിവരുടെ നേതൃത്വത്തിലാണ് കാർ പിടികൂടിയത്.
