നിഷ്കളങ്കമായ ഒരു ചിരിയിൽ മാറിയ തലവര; വൈറൽ വീഡിയോയിലൂടെ ജീവിതം തിരിച്ചുപിടിച്ച് അരുൺ
നിങ്ങൾ ഒരിക്കലെങ്കിലും കണ്ടിട്ടുണ്ടായിരിക്കും ചൂടു ചായ കുടിക്കുമ്പോൾ ഉള്ള ആ നിഷ്കളങ്കമായ ചിരി.
സോഷ്യൽ മീഡിയയിലെ ഒരു കൊച്ചു വീഡിയോ എങ്ങനെ ഒരാളുടെ ജീവിതം മാറ്റിമറിക്കും എന്നതിന് തെളിവായി മാറുകയാണ് തെലങ്കാന സ്വദേശിയായ അരുൺ. കയ്യിലൊരു ചായക്കപ്പുമായി നിഷ്കളങ്കമായി ചിരിക്കുന്ന അരുണിന്റെ ചിത്രം മലയാളികളടക്കം ലക്ഷക്കണക്കിന് ആളുകളാണ് ഏറ്റെടുത്തത്. എന്നാൽ ആ ചിരിക്ക് പിന്നിൽ ദാരിദ്ര്യത്തോടുള്ള ഒരു വലിയ പോരാട്ടത്തിന്റെ കഥയുണ്ടായിരുന്നു.
ഒരു ട്രക്ക് ക്ലീനറായി ജോലി നോക്കുകയായിരുന്നു അരുൺ. കൂടെയുള്ള ഡ്രൈവർ നെഹ്റു ആണ് അരുണിന്റെ നിഷ്കളങ്കമായ ഭാവം പകർത്തി സോഷ്യൽ മീഡിയയിൽ പങ്കുവെച്ചത്. ദാരിദ്ര്യത്തിന്റെ കയ്പുനീർ കുടിക്കുമ്പോഴും മുഖത്ത് വിരിഞ്ഞ ആ പുഞ്ചിരി ലോകം ഏറ്റെടുത്തു. നിമിഷനേരം കൊണ്ട് വീഡിയോ വൈറലായതോടെ അരുൺ ഒരു സോഷ്യൽ മീഡിയ താരമായി മാറി.
വീഡിയോ വൈറലായതോടെ ലഭിച്ച പ്രശസ്തി അരുണിന്റെ ജീവിതത്തിൽ വലിയ മാറ്റങ്ങൾ കൊണ്ടുവന്നു. മൂന്നാം ക്ലാസ്സിൽ പഠനം നിർത്തേണ്ടി വന്ന അരുണിന് തുണയായത് ഡ്രൈവർ നെഹ്റുവാണ്. അരുണിനെ വീണ്ടും സ്കൂളിൽ ചേർത്ത അദ്ദേഹം, അവന്റെ പഠനകാര്യങ്ങളിൽ പൂർണ്ണ പിന്തുണ നൽകി.
”നെഹ്റു എനിക്ക് ദൈവത്തെപ്പോലെയാണ്. ദാരിദ്ര്യത്തിൽ കഷ്ടപ്പെട്ടിരുന്ന ആ കാലത്തെ എന്റെ ചിരി ജീവിതം മാറ്റിമറിക്കുമെന്ന് ഞാൻ സ്വപ്നത്തിൽ പോലും കരുതിയില്ല,” അരുൺ പറയുന്നു.
ജോലി ഉപേക്ഷിച്ച് വീണ്ടും പുസ്തകമെടുത്ത അരുൺ ഇപ്പോൾ പത്താം ക്ലാസ്സ് പരീക്ഷ വിജയിച്ചിരിക്കുകയാണ്. ഉന്നത പഠനം പൂർത്തിയാക്കി ഒരു നല്ല ജോലി സമ്പാദിക്കണമെന്നും, തന്നെപ്പോലെ കഷ്ടപ്പെടുന്ന കുട്ടികളെ സഹായിക്കണമെന്നുമാണ് ഈ കൊച്ചു മിടുക്കന്റെ ആഗ്രഹം..
ദാരിദ്ര്യത്തിന്റെ കയ്പുനീർ കുടിക്കെ പകർത്തിയ ഒരു കൊച്ചു വീഡിയോയിലൂടെ ലോകശ്രദ്ധ നേടിയ അരുൺ, ഇന്ന് തടസ്സപ്പെട്ടുപോയ തന്റെ വിദ്യാഭ്യാസം തിരിച്ചുപിടിച്ച് പത്താം ക്ലാസ്സ് വിജയിച്ചിരിക്കുന്നു. തളരാത്ത പുഞ്ചിരിയും കൂടെയുണ്ടായിരുന്ന ഡ്രൈവർ നെഹ്റുവിന്റെ കരുതലും ചേർന്ന് ഒരു ട്രക്ക് ക്ലീനറുടെ ജീവിതത്തെ അതിജീവനത്തിന്റെ വലിയൊരു പാഠമാക്കി മാറ്റിയിരിക്കുകയാണ്.
