കേരള പോലീസ് ഫുട്ബോള് ടീം ക്യാപ്റ്റന് ശ്രീരാഗിന്റെ വിവാഹം ആഘോഷമാക്കി താരങ്ങള്
ചാലിശേരി: കേരള പോലീസ് ഫുട്ബോള് ക്യാപ്റ്റന് ശ്രീരാഗിന്റെ വിവാഹം ആഘോഷമാക്കി താരങ്ങള്. കേരള പോലീസ് ഫുട്ബോള് ക്യാപറ്റന് ചാലിശേരി വലിയ വീട്ടുവളപ്പില് ശ്രീരാഗും , തൃശൂര് ആറ്റൂര് പാലഞ്ചേരി വീട്ടില് വിജിഷയും തമ്മില് ബുധനാഴ്ച ആറ്റൂര് കാര്ത്ത്യാനി ഭഗവതി ക്ഷേത്രത്തില് വെച്ചാണ് വിവാഹിതരായത്. ഫുട്ബോള് രംഗത്ത്, ലോകത്തിലെ ഏറ്റവും മുന് നിരയില് നില്ക്കുന്ന ഇംഗ്ലീഷ് പ്രീമിയര് ലീഗ് ഫുട്ബോള് ക്ലബ്ബ് ചെല്സി വിവാഹ ആശംസകള് അറിയിച്ചത് നവ ദമ്പതിമാര്ക്കും ഗ്രാമത്തിലെ ഫുട്ബോള് ആരാധകര്ക്കുംആഹ്ലാദമായി.അഞ്ച് വര്ഷം തുടര്ച്ചയായി കേരള സന്തോഷ ട്രോഫി ടീമില് കളിച്ച ശ്രീരാഗ് 2017ല് കല്ക്കത്തയില് വെച്ച് നടന്ന സന്തോഷ് ട്രോഫി ജയിച്ച കേരള ടീമിലെ അംഗമായിരുന്നു.ഇപ്പോള് കേരള പോലീസ് ഫുട്ബോള് ടീമിലും , ഒഴിവ് സമയങ്ങളില് ഫുട്ബോള് രംഗത്ത് ഗ്രാമത്തിലഭിമാനമായ ചാലിശേരി ജിസിസി ക്ലബ്ബിലും നിറ സന്നിധ്യമാണ് അമ്പാടി.ബുധനാഴ്ച വൈകീട്ട് ചാലിശേരി പി.പി. ഓഡിറ്റോറിയത്തില് ഐ എം.വിജയന്റെ നേതൃത്വത്തില് ദമ്പതിമാര്ക്ക് ആശംസകള് അര്പ്പിച്ച് പോലീസ് താരങ്ങളും , സന്തോഷ് ട്രോഫി താരങ്ങളും എത്തി. ജിസിസി ക്ലബ്ബ് നവ ദമ്പതിമാര്ക്ക് സ്നേഹ ഉപകാരവും , മംഗള പത്രവും നല്കി.
