കുതിച്ച്‌ കറുത്ത പൊന്നും; കുരുമുളക് വില കിലോക്ക് 715 കടന്നു
കട്ടപ്പന: പൊന്നിനൊപ്പം കുതിച്ചു കയറി കറുത്ത പൊന്നായ കുരുമുളകിന്‍റെ വിലയും. കട്ടപ്പന മാർക്കറ്റില്‍ കുരുമുളക് വില കിലോക്ക് 715 കടന്നു.2014ല്‍ കുരുമുളക് വില 740ല്‍ എത്തിയിരുന്നു.
ഇപ്പോഴത്തെ കുതിപ്പ് തുടർന്നാല്‍ ചുരുങ്ങിയ ദിവസങ്ങള്‍ക്കുള്ളില്‍ പഴയ ഉയർന്ന വിലയെ മറി കടക്കും. ഇന്നലെ 720 രൂപക്ക് വരെ കുരുമുളക് വാങ്ങിയ വ്യാപാരികളും ഉണ്ട്‌. കൊച്ചി മാർക്കറ്റില്‍ ഗാർബിള്‍ഡ് കുരുമുളകിന് 725 രൂപ വരെ ഉയർന്നു. ഡിമാൻഡ് ഉയർന്ന് നില്‍ക്കുന്നതും ആഭ്യന്തര മാർക്കറ്റില്‍ കുരുമുളക് ലഭ്യത കുറഞ്ഞതും മുൻനിർത്തി 725 രൂപക്ക് വരെ കുരുമുളക് വാങ്ങാൻ വ്യാപാരികള്‍ മത്സരിക്കുന്നുണ്ട്.
ഒരാഴ്ചക്കുള്ളില്‍ കുരുമുളക് വില സർവകാല റെക്കോഡും പിന്നിട്ട് മുന്നോട്ട് കുതിക്കുമെന്നാണ് വ്യാപാരികള്‍ നല്‍കുന്ന സൂചന.ഒരു വർഷം മുൻപ് കിലോക്ക് 550 രൂപയായിരുന്നു വില. ജൂണ്‍ ആദ്യ ആഴ്‌ച 630 രൂപയിലേക്ക് ഉയർന്നു. പിന്നീട് 620- 650 നിലവാരത്തില്‍ വലിയ ഏറ്റക്കുറച്ചിലുകള്‍ ഇല്ലാതെ മുന്നോട്ടു പോയി.
കഴിഞ്ഞ രണ്ടാഴ്ചക്കുള്ളില്‍ പൊടുന്നനെ 700ലേക്ക് ഉയരുകയായിരുന്നു. രണ്ടാഴ്ചക്കിടെ കിലോക്ക് ശരാശരി 65 രൂപയുടെ വർധനയുണ്ടായി. വരുംദിവസങ്ങളില്‍ വില കൂടുമെന്നാണ് കച്ചവടക്കാർ പറയുന്നത്.
