ഇൻസ്റ്റഗ്രാമില്‍ പോസ്റ്റ് ചെയ്ത വീഡിയോയില്‍ കമന്റിട്ടതുമായി ബന്ധപ്പെട്ട തര്‍ക്കം; ഒറ്റപ്പാലം എന്‍എസ്‌എസ് കോളേജില്‍ വിദ്യാര്‍ഥിയെ ആക്രമിച്ച കെഎസ്യു നേതാക്കള്‍ അറസ്റ്റില്‍
പാലക്കാട്: ഒറ്റപ്പാലം എന്‍എസ്‌എസ് കോളേജില്‍ രണ്ടാം വർഷ വിദ്യാർഥിയെ ആക്രമിച്ച നാല് കെഎസ്യു നേതാക്കള്‍ അറസ്റ്റില്‍.കോളേജ് യൂണിയൻ ഭാരവാഹി ദർശൻ, കെഎസ്യു യൂണിറ്റ് ജോയിൻ സെക്രട്ടറി റഹൂഫ്, യൂണിറ്റ് വൈസ് പ്രസിഡൻറ് സൂരജ്, കെഎസ്യു ഡിപ്പാർട്ട്മെൻറ് പ്രസിഡൻറ് അഭിനേഷ് എന്നിവരുടെ അറസ്റ്റാണ് പൊലീസ് രേഖപ്പെടുത്തിയത്. ഇന്നലെ ഉച്ചയ്ക്ക് കോളേജിലാണ് സംഘർഷമുണ്ടായത്. ക്ലാസിലിരുന്ന വിദ്യാർത്ഥിയെ കെഎസ്യു പ്രവർത്തകർ ചേർന്ന് ആക്രമിക്കുകയായിരുന്നു.
ഇൻസ്റ്റഗ്രാമില്‍ പോസ്റ്റ് ചെയ്ത വീഡിയോയില്‍ കമന്റിട്ടതുമായി ബന്ധപ്പെട്ട തർക്കമാണ് സംഘർഷത്തില്‍ കലാശിച്ചത്. ഇന്നലെയായിരുന്നു കോളേജിലെ രണ്ടാം വർഷ ഹിസ്റ്ററി വിദ്യാർത്ഥിയായ കാർത്തിക്കിനെ കെഎസ്യു പ്രവർത്തകർ ക്രൂരമായി മർദ്ദിച്ചത്. ആക്രമത്തില്‍ കാർത്തിക്കിന്‍റെ കഴുത്തിന് ഉള്‍പ്പടെ സാരമായി പരിക്കേറ്റിരുന്നു. വിദ്യാർത്ഥി ആശുപത്രിയില്‍ ചികിത്സയില്‍ തുടരുകയാണ്.
കാര്‍ത്തിക്കിനെ കേബിള്‍ ഉപയോഗിച്ച്‌ കഴുത്തില്‍ മുറുക്കിയെന്നും മരത്തടി കൊണ്ട് ആക്രമിച്ചെന്നുമാണ് എഫ്‌ഐആറില്‍ പറയുന്നത്. സംഘർഷത്തില്‍ നിരവധി എസ്‌എഫ്‌ഐ പ്രവർത്തകർക്ക് പരിക്കേറ്റു. ഇതിനെതിരെ ശക്തമായ നടപടി ആവശ്യപ്പെട്ട് എസ്‌എഫ്‌ഐ പ്രതിഷേധ പ്രകടനം നടത്താനും തീരുമാനിച്ചിരുന്നു. സംഭവത്തില്‍ പോലീസ് വിശദമായ അന്വേഷണം ആരംഭിച്ചു.
