ഇൻസ്റ്റഗ്രാമിലൂടെ സൗഹൃദം, സ്വർണാഭരണങ്ങളുമായി മുങ്ങും; ‘കിനാവിന്റെ രാജകുമാരൻ’ അറസ്റ്റിൽ
കോട്ടക്കൽ: ഇന്സ്റ്റഗ്രാമിലൂടെ സൗഹൃദം സ്ഥാപിച്ച ശേഷം യുവതികളുടെ സ്വര്ണാഭരണവുമായി കടന്നുകളയുന്നത് പതിവാക്കിയ മലപ്പുറം സ്വദേശി പിടിയില്. കോട്ടക്കല് കുണ്ടുബസാറിലെ കുഞ്ഞിത്തൊടിയില് മുഹമ്മദ് ജസീലിനെയാണ് വടകര പൊലീസ് അറസ്റ്റ് ചെയ്തത്.
ഫില്ട്ടറിട്ട് ലുക്ക് മാറ്റി ‘കിനാവിന്റെ രാജകുമാരന്’ എന്ന ഇന്സ്റ്റഗ്രാം എന്ന പേജിലൂടെയാണ് ഇയാള് സ്ത്രികളെ പറ്റിച്ചിരുന്നത്. കോഴിക്കോട് വളയം സ്വദേശിനിയായ യുവതിയുടെ പരാതിയിലാണ് നടപടി. ഇവരില് നിന്ന് പന്ത്രണ്ട് പവനോളം വരുന്ന സ്വര്ണാഭരണങ്ങള് ജസീല് കൈക്കലാക്കിയതായി പൊലീസ് വിശദമാക്കി. സൗഹൃദം സ്ഥാപിക്കുന്ന സ്ത്രീകളെ വിവിധ സ്ഥലങ്ങളിലേക്ക് വിളിച്ചുവരുത്തി സ്വര്ണാഭരണം തട്ടുന്നതാണ് ഇയാളുടെ രീതി.
കോഴിക്കോട് ടൗണ് സ്റ്റേഷനില് സ്വര്ണം തട്ടിയതിനും ഭീഷണിപ്പെടുത്തി പീഡനം നടത്തിയതിനും ഇയാള്ക്കെതിരെ കേസ് നിലവിലുണ്ട്. ഈ കേസില് റിമാന്ഡില് കഴിയുന്ന പ്രതിയെ വടകര പൊലീസ് കസ്റ്റഡിയില് വാങ്ങുകയായിരുന്നു. നിരവധി സ്ത്രീകള് ഇയാളുടെ വലയില്പ്പെട്ടിട്ടുണ്ടെന്നും പൊലീസ് പറഞ്ഞു.
