ആഗോള ആയുർവേദ ഭൂപടത്തിൽ ഇടമുറപ്പിച്ച് ആയുർഗ്രീൻ; 32 രാജ്യങ്ങളിൽ നിന്നുള്ള പ്രതിനിധികൾ എടപ്പാളിലെത്തി
എടപ്പാൾ : സംസ്ഥാന വിനോദസഞ്ചാര വകുപ്പും ആയുർവേദ പ്രമോഷൻ സൊസൈറ്റിയും (APS) സംയുക്തമായി കോഴിക്കോട്ട് സംഘടിപ്പിച്ച ഒന്നാമത് ‘ഇന്റർനാഷണൽ ആയുർവേദ ആൻഡ് വെൽനസ് കോൺക്ലേവ് 2026’-ന്റെ ഭാഗമായി എടപ്പാളിലെ ആയുർഗ്രീൻ ഹോസ്പിറ്റലിൽ വിദേശ പ്രതിനിധി സംഘം സന്ദർശനം നടത്തി. ലോകത്തിന്റെ വിവിധ ഭാഗങ്ങളിൽ നിന്നുള്ള 32 രാജ്യങ്ങളെ പ്രതിനിധീകരിച്ച് നൂറിലധികം വെൽനസ് ടൂർ ഓപ്പറേറ്റർമാരാണ് ആയുർഗ്രീനിലെ ചികിത്സാ സൗകര്യങ്ങൾ നേരിട്ടറിയാൻ എത്തിയത്.
ആയുർവേദ പാരമ്പര്യത്തെ അത്യാധുനിക സാങ്കേതികവിദ്യയുമായി കോർത്തിണക്കിയുള്ള ആയുർഗ്രീനിന്റെ ‘ഇന്റഗ്രേറ്റഡ് അപ്രോച്ച്’ (Integrated Approach) അന്താരാഷ്ട്ര തലത്തിൽ ശ്രദ്ധ നേടുന്നതിന്റെ തെളിവായി ഈ സന്ദർശനം മാറി. പ്രത്യേകിച്ചും, സ്ട്രോക്ക് റിഹാബിലിറ്റേഷൻ രംഗത്ത് ഹോസ്പിറ്റൽ നടപ്പിലാക്കുന്ന അഡ്വാൻസ്ഡ് റോബോട്ടിക്സ് (Advanced Robotics) സാങ്കേതികവിദ്യ വിദേശ പ്രതിനിധികൾക്ക് പുത്തൻ അനുഭവമായി. ആധുനിക റോബോട്ടിക് ഉപകരണങ്ങൾ ഉപയോഗിച്ചുള്ള പക്ഷാഘാത ചികിത്സാരീതികൾ സംഘം നേരിട്ട് വിലയിരുത്തി.
മലബാർ ചേംബർ ഓഫ് കൊമേഴ്സുമായി സഹകരിച്ച് നടന്ന ബിസിനസ് ടു ബിസിനസ് (B2B) കോൺക്ലേവിലും ആയുർഗ്രീൻ സജീവ സാന്നിധ്യമായിരുന്നു. ഹോട്ടൽ ഡിമോറയിൽ നടന്ന മീറ്റിൽ 36 ഓളം രാജ്യങ്ങളിൽ നിന്നുള്ള പ്രതിനിധികളുമായി ആരോഗ്യ ടൂറിസം സാധ്യതകൾ ചർച്ച ചെയ്യാൻ സാധിച്ചു. ടൂറിസം വകുപ്പ് മന്ത്രി ശ്രീ. പി. എ. മുഹമ്മദ് റിയാസ് ഉദ്ഘാടനം ചെയ്ത കോൺക്ലേവിൽ കേരളത്തെ ലോകത്തിന്റെ വെൽനസ് ഹബ്ബാക്കി മാറ്റുക എന്ന ലക്ഷ്യമാണ് മുന്നോട്ടുവെച്ചത്.
അന്താരാഷ്ട്ര വെൽനസ് ടൂർ ഓപ്പറേറ്റർമാരുടെ ഈ സന്ദർശനം വരും വർഷങ്ങളിൽ കേരളത്തിലേക്കുള്ള ആരോഗ്യ വിനോദസഞ്ചാരികളുടെ എണ്ണത്തിൽ വലിയ വർദ്ധനവുണ്ടാക്കുമെന്നാണ് പ്രതീക്ഷിക്കുന്നത്.
