അക്ഷയതൃതീയയും സ്വര്‍ണ്ണവും: ഐശ്വര്യം വര്‍ധിപ്പിക്കുന്ന ഈ ദിനത്തെപ്പറ്റി അറിയാം
അക്ഷയ തൃതീയ നാളില്‍ സ്വര്‍ണം വാങ്ങാത്തവര്‍ വളരെ വിരളമാണ്. അക്ഷയ തൃതീയ ശുഭകരമായ ദിനമായി കണക്കാക്കപ്പെടുന്നതിനാല്‍, പലരും ഈ ദിവസം പുതിയ സംരംഭങ്ങള്‍ ആരംഭിക്കുന്നു. ഈ ദിവസം വിലയേറിയ ലോഹങ്ങള്‍ വാങ്ങുന്നത് ഐശ്വര്യവും ഭാഗ്യവും കൊണ്ടുവരുമെന്നും ആളുകള്‍ വിശ്വസിക്കുന്നു.
സുവര്‍ണ കാലഘട്ടത്തിന്റെ തുടക്കമായാണ് അക്ഷയ തൃതീയയെ വിശ്വാസികള്‍ കാണുന്നത്. അക്ഷയ തൃതീയയില്‍ ചന്ദ്രന്റെയും എല്ലാ ഗ്രഹങ്ങളുടെയും അധിപനായി കരുതപ്പെടുന്ന സൂര്യന്‍ അതിന്റെ ഏറ്റവും ഉയര്‍ന്ന പ്രകാശത്തിലാണെന്നും ഇത് വിവാഹമുള്‍പ്പെടെയുള്ള മംഗള കാര്യങ്ങള്‍ക്ക് അനുകൂലമാണെന്നും കരുതപ്പെടുന്നു.
സ്വര്‍ണം വാങ്ങുന്നതിനും നിക്ഷേപിക്കുന്നതിനും പറ്റിയ ദിവസമെന്ന് കരുതപ്പെടുന്ന അക്ഷയ തൃതീയ, ഇന്ത്യയിലെ ജൈന സമൂഹത്തിന് വളരെ പ്രധാനമാണ്. നൂറ്റാണ്ടുകള്‍ക്കുമുമ്പ് അയോധ്യയിലെ രാജാവായിരുന്ന ഋഷഭദേവന് സമര്‍പ്പിക്കാന്‍ അയോധ്യയില്‍ നിന്നുള്ള ഭക്തര്‍ സ്വര്‍ണവും ആഭരണങ്ങളും വാങ്ങിയത് ഈ ദിവസമാണെന്നാണ് ഐതിഹ്യം. മറ്റൊരു വിശ്വാസമനുസരിച്ച് അക്ഷയ തൃതീയ നാളിലാണ് കുബേരനെ സ്വര്‍ഗത്തിന്റെ സമ്പത്തിന്റെ സൂക്ഷിപ്പുകാരനാക്കിയതെന്നും ഈ ദിവസം തന്നെ സ്വര്‍ണം വാങ്ങുകയും കുബേരനെ ആരാധിക്കുകയും ചെയ്യുന്നത് ഐശ്വര്യം നല്‍കുമെന്നും ഒരു വിഭാഗം വിശ്വസിക്കുന്നു.
