പൊന്നാനി സ്റ്റാൻഡിേലക്ക് സർവീസ് നടത്തേണ്ട ബസുകൾ കുണ്ടുകടവ് ജങ്ഷനിൽ യാത്ര അവസാനിപ്പിക്കുന്നു;നടപടിയുമായി മോട്ടോർ വാഹനവകുപ്പ്

പൊന്നാനി : മാറഞ്ചേരി ഭാഗത്തുനിന്ന് പൊന്നാനിയിലേക്ക് നേരിട്ട് ബസുണ്ടെങ്കിലും കുണ്ടുകടവ് ജങ്ഷനിലെത്തിയാൽ ബസ് മാറിക്കയറണം. പെർമിറ്റുപ്രകാരം സ്റ്റാൻഡിലേക്ക് സർവീസ് നടത്തേണ്ട ബസ് ആണെങ്കിലും കുണ്ടുകടവ് ജങ്ഷനിലെത്തിയാൽ യാത്ര അവസാനിപ്പിക്കും. വർഷങ്ങളായി തുടരുന്ന ഈ രീതിക്കെതിരേ നടപടി ശക്തമാക്കാനൊരുങ്ങുകയാണ് മോട്ടോർ വാഹനവകുപ്പ്.

പൊന്നാനി-ഗുരുവായൂർ റൂട്ടിലോടുന്ന സ്വകാര്യബസുകളാണ് പാതിവഴിയിൽ സർവീസ് അവസാനിപ്പിക്കുന്നത്. കോടതിയും ഒട്ടേറേ സർക്കാർ ഓഫീസുകളും വിദ്യാഭ്യാസ സ്ഥാപനങ്ങളും പൊന്നാനിയിൽ പ്രവർത്തിക്കുന്നുണ്ട്. ഇവിടേക്കെല്ലാം എത്തിപ്പെടണമെങ്കിൽ കുണ്ടുകടവ് ജങ്ഷനിൽനിന്ന് എടപ്പാൾ-പൊന്നാനി റൂട്ടിലോടുന്ന ബസുകളെ ആശ്രയിക്കണം.

പൊന്നാനിയിൽനിന്ന് പുത്തൻപള്ളി, ആൽത്തറ വഴി ഗുരുവായൂർ, കുന്നംകുളം ഭാഗത്തേക്ക്‌ പോകുന്നവർക്കും കുണ്ടുകടവ് ജങ്ഷനിലെത്തിയാലേ ബസ് കിട്ടുകയുള്ളൂ. വിദ്യാർഥികൾ ഉൾപ്പെടെയുള്ളവർ ഇതുമൂലം ഏറേ ബുദ്ധിമുട്ടുന്നുണ്ട്.

അനുവദിച്ച പെർമിറ്റുപ്രകാരം കുന്നംകുളം, ഗുരുവായൂർ എന്നിവിടങ്ങളിൽനിന്ന് പൊന്നാനിയിലേക്ക് സർവീസ് നടത്തുന്ന മിക്ക ബസുകളും സ്റ്റാൻഡുവരെ പോകേണ്ടതാണ്. എന്നാൽ, സമയക്കുറവും നഷ്ടവും ചൂണ്ടിക്കാട്ടി ബസുകാർ യാത്ര കുണ്ടുകടവ് ജങ്ഷനിൽ അവസാനിപ്പിക്കുകയാണ്. യാത്രക്കാർ പ്രതിഷേധമറിയിച്ചാലും സർവീസ് നടത്താൻ ബസുകാർ തയ്യാറാകാറില്ല. സർവീസ് നടത്തുന്നതിനുള്ള സമയം കുറവാണെന്നകാര്യം അധികൃതരുമായി മുൻപ് ചർച്ച ചെയ്തതാണെന്നും കുണ്ടുകടവ് ജങ്ഷനിൽ യാത്ര അവസാനിപ്പിക്കുന്നതിന് അനുമതി നൽകിയിട്ടുണ്ടെന്നുമാണ് ചില ബസുകാർ പറയുന്നത്.

ഈ റൂട്ടിൽ സ്വകാര്യബസുകൾ മാത്രമാണ് സർവീസ് നടത്തുന്നത്. ബസ് ജീവനക്കാരുടെ ധിക്കാരപരമായ സമീപനത്തിനെതിരേ പരാതിയുയർന്ന സാഹചര്യത്തിൽ മോട്ടോർവാഹന വകുപ്പ് പരിശോധന ആരംഭിച്ചു. ജോയിന്റ് ആർ.ടി.ഒ. ശങ്കരൻപിള്ളയുടെ നിർദേശപ്രകാരം എം.വി.ഐ. തോമസ് സ്‌കറിയ, എ.എം.വി.ഐ. മാരായ അശ്‌റഫ്, രാജേഷ് എന്നിവരുടെ നേതൃത്വത്തിൽ കുണ്ടുകടവ് ജങ്ഷനിലെത്തി പെർമിറ്റ് പരിശോധിച്ചു. പെർമിറ്റ് പ്രകാരം സർവീസ് നടത്താത്ത ബസ് ജീവനക്കാർക്ക് താക്കീത് നൽകി. പരിശോധന തുടരുമെന്നും പെർമിറ്റ് പ്രകാരം സർവീസ് നടത്തിയില്ലെങ്കിൽ കർശന നടപടിയുണ്ടാകുമെന്നും അധികൃതർ അറിയിച്ചു.