തുഞ്ചൻ വിദ്യാരംഭം കലോത്സവത്തിന് ഞായറാഴ്ച തിരശ്ശീല വീഴും

തിരൂർ: ഒമ്പത് ദിവസം നീണ്ടുനിന്ന തിരൂർ തുഞ്ചൻ വിദ്യാരംഭം കലോത്സവത്തിന് ഞായറാഴ്ച തിരശ്ശീല വീഴും. വിജയദശമിനാളായ ഒക്ടോബർ 13ന് വിദ്യാരംഭത്തിനു പുറമെ കവികളുടെ വിദ്യാരംഭവും വിവിധ നൃത്തപരിപാടികളും നടക്കും. ഞായറാഴ്ച പുലർച്ചെ അഞ്ചു മുതൽ തുഞ്ചൻ സ്മാരക കൃഷ്ണശില മണ്ഡപത്തിലും സരസ്വതീ മണ്ഡപത്തിലും എഴുത്തുകാരും പാരമ്പര്യ എഴുത്താശാന്മാരും എഴുത്തിനിരുത്തും. തുഞ്ചൻ സ്മാരക ഹാളിൽ നടക്കുന്ന കവികളുടെ വിദ്യാരംഭം പരിപാടിയിൽ നാൽപ്പതിലേറെ എഴുത്തുകാർ കവിതചൊല്ലി വിദ്യാരംഭം കുറിക്കും. വിദ്യാരംഭത്തിന് മുൻകൂർ ബുക്കിങ് ഇല്ല. ഒക്ടോബർ അഞ്ചിനാണ് തുഞ്ചൻ വിദ്യാരംഭം കലോത്സവത്തിന് തുടക്കമായത്. ചലച്ചിത്ര സംവിധായകൻ രോഹിത് എം.ജി. കൃഷ്ണനാണ് വിദ്യാരംഭം കലോത്സവം ഉദ്ഘാടനം ചെയ്തത്. തുടർന്ന് സോപാന സംഗീതം, ഭരതനാട്യം, തിരുവാതിരക്കളി, കാവ്യകേളി, മോഹിനിയാട്ടം, കുച്ചിപ്പുടി, നൃത്താർപ്പണം, ആത്മഗാനം, കൈകൊട്ടിക്കളി, മോഹിനിയാട്ടം, നൃത്തനൃത്യങ്ങൾ, തിരുവാതിരക്കളി, ഭരതനാട്യം, നൃത്തനൃത്യങ്ങൾ, നങ്ങ്യാർക്കൂത്ത്, ഭരതസമർപ്പണം, നൃത്തശില്പം, നൃത്തോപാസന, സംഗീതക്കച്ചേരി എന്നിവ വിവിധ ദിവസങ്ങളിലായി നടന്നു. മഹാനവമി നാളായ ശനിയാഴ്ച കഥാപ്രസംഗം, സംഗീതാർച്ചന, തിരുവാതിരക്കളി, നൃത്തങ്ങൾ എന്നിവ അരങ്ങേറും.