ജ്വല്ലറിയുടെ പേരിൽ 7 വർഷം മുൻപ് നടന്ന നിക്ഷേപത്തട്ടിപ്പ്; ഇരകൾ നീതിതേടി അലയുന്നു

July 14, 2023

തിരൂർ ∙ ജ്വല്ലറിയുടെ പേരിൽ 7 വർഷം മുൻപ് നടന്ന നിക്ഷേപത്തട്ടിപ്പിൽ ഇരയായ ഏജന്റുമാർ ഇന്നും നീതി തേടി അലയുന്നു. അവസാന പ്രതീക്ഷയെന്ന നിലയിൽ മുഖ്യമന്ത്രിക്കു പരാതി നൽകാനൊരുങ്ങുകയാണ് ഇവർ. തുഞ്ചത്ത് ജ്വല്ലറിയുടെ പേരിലാണ് തട്ടിപ്പു നടന്നത്. 2013ൽ തിരൂർ, എടപ്പാൾ, കണ്ണൂർ എന്നിവിടങ്ങളിൽ തുഞ്ചത്ത് എന്ന പേരിൽ ജ്വല്ലറി തുടങ്ങുകയും അറുനൂറോളം പേരെ നിയമിച്ച് അവർ വഴി 100 കോടിയോളം രൂപയും സ്വർണവും നിക്ഷേപത്തിന്റെ പേരിൽ പിരിച്ചെടുക്കുകയായിരുന്നു എന്ന് അന്നത്തെ ഏജന്റുമാർ പറയുന്നു.

ഈ പണമുപയോഗിച്ച് സംസ്ഥാനത്തും പുറത്തും സ്വന്തം പേരിലും ബെനാമി പേരിലും ഇവർ ഒട്ടേറെ ഭൂമി വാങ്ങിയിരുന്നതായും ആരോപിക്കുന്നു. തുടർന്ന് 2016 ജൂലൈയിൽ മാനേജിങ് ഡയറക്ടർ മുതിയേരി ജയചന്ദ്രൻ എന്നയാളും 14 ഡയറക്ടർമാരും ബെംഗളൂരുവിലേക്കു കടന്നു. ഇതോടെ ഏജന്റുമാർ പൊലീസിൽ പരാതി നൽകി, ജയചന്ദ്രനെ അറസ്റ്റ് ചെയ്തു. 2018ൽ വസ്തുവകകൾ വിറ്റ് നിക്ഷേപകർക്കും ഏജന്റുമാർക്കും പണം തിരികെ കൊടുക്കാമെന്ന ജാമ്യ വ്യവസ്ഥയിൽ ജയിലിൽ നിന്ന് പുറത്തിറങ്ങി. എന്നാൽ ഇതുവരെ പണം നൽകിയില്ലെന്നാണ് ഏജന്റുമാരുടെ പരാതി. തങ്ങൾ വഴി പണം നിക്ഷേപിച്ചവർക്ക് ഇതിനിടെ പലരും വീട് വിറ്റും മറ്റുമാണ് പണം തിരികെ നൽകിയത്. തലക്കടത്തൂർ അരീക്കാട് സഫിയ (58) 77 ലക്ഷം രൂപയാണ് പലരിൽ നിന്നായി ശേഖരിച്ചു നൽകിയിരുന്നത്. സ്വന്തം വീട്  വിറ്റാണ് പണം തിരികെ നൽകിയത്. 60 വയസ്സുള്ള വൈലത്തൂരിലെ സൽമത്തും ഈ പ്രയാസത്തിലാണ്. ഇവരുടെ സ്വർണവും സംഘം ജ്വല്ലറിയിൽ നിക്ഷേപിച്ചിട്ടുണ്ട്. ബന്ധുക്കൾ പോലും അകറ്റി നിർത്തുന്ന സ്ഥിതിയാണെന്ന് ഏജന്റുമാർ പറയുന്നു.