കഞ്ഞിപ്പുര -മൂടാൽ ബൈപ്പാസ് റോഡ് : പൂർത്തിയായത് ഒന്നേമുക്കാൽ കിലോമീറ്റർ മാത്രം

കുറ്റിപ്പുറം : ഒരു പതിറ്റാണ്ടായിട്ടും മൂടാൽ -കഞ്ഞിപ്പുര ബൈപ്പാസ് റോഡ് നിർമാണം പാതിവഴിയിൽ. ആറരക്കിലോമീറ്റർ ദൂരം വരുന്ന റോഡിൽ ഒരു പതിറ്റാണ്ടിലെത്തുമ്പോൾ നിർമാണം പൂർത്തിയായത് കഞ്ഞിപ്പുര മുതൽ അമ്പലപ്പറമ്പ് വരെ ഒന്നേമുക്കാൽ കിലോമീറ്റർ മാത്രം.മൂടാൽ മുതൽ ചുങ്കം വരെ മെറ്റൽ പാകൽ നടന്നതിനാൽ യാത്രയ്ക്ക് വലിയ ബുദ്ധിമുട്ടില്ല. എന്നാൽ ചുങ്കം മുതൽ അമ്പലപ്പറമ്പ് വരെ കടുത്ത യാത്രാദുരിതമാണ്.

മഴയുടെ പേരിൽ നിലവിൽ നടന്നുകൊണ്ടിരുന്ന നിർമാണപ്രവർത്തനങ്ങളും നിലച്ച മട്ടാണ്. ഇപ്പോൾ ആകെ നടക്കുന്നത് ചുങ്കത്ത് ഒരു കൾവർട്ടിന്റെ നിർമാണം മാത്രമാണ്.

നിലവിൽ 11.34 കോടി രൂപയുടെ നിർമാണപ്രവർത്തനങ്ങളാണ് നടക്കുന്നത്. ഈ ഫണ്ട് 20 കോടി രൂപയിലേക്ക് ഉയർത്തിയാൽ മാത്രമേ പ്രവർത്തനങ്ങൾ പൂർത്തീകരിക്കാൻ കഴിയൂ. ഇതിന്റെ പശ്ചാത്തലത്തിൽ സ്ഥലം എം.എൽ.എ. ആബിദ് ഹുസൈൻ തങ്ങൾ നിർമാണഫണ്ട് 25 കോടിയാക്കി ഉയർത്തണമെന്ന് സർക്കാരിനോട് ആവശ്യപ്പെട്ടെങ്കിലും അനുവദിക്കപ്പെട്ടില്ല. പിന്നീട് എം.എൽ.എ. നടത്തിയ സമ്മർദത്തെത്തുടർന്ന് അഞ്ചു കോടി അനുവദിച്ചു.

എന്നാൽ, ഈ തുകയിൽ നിന്ന് ജി.എസ്.ടി. കൂടി കഴിഞ്ഞാൽ 4.10 കോടിയാണ് ലഭിക്കുക. അപ്പോൾ ഫണ്ട് 15.44 കോടി രൂപ മാത്രമായി മാറും. നിലവിലെ നിർമാണപദ്ധതി അനുസരിച്ച് ഈ ഫണ്ട് ഉപയോഗിച്ച് റോഡ് പുനർനിർമാണം ഒരിക്കലും പൂർത്തീകരിക്കാൻ കഴിയില്ല. അതിനാൽ നിലവിലെ സാഹചര്യത്തിൽ പുതിയ ഫണ്ട് കൂടി ഉൾപ്പെടുത്തിയുള്ള ഫണ്ടിന് അനുസൃതമായി പുനർനിർമാണം പൂർത്തിയാക്കാനുള്ള പദ്ധതിയാണ് പൊതുമരാമത്ത് വകുപ്പു തയ്യാറാക്കിയത്. അതിനാൽത്തന്നെ റോഡ് റബ്ബറൈസ് ചെയ്യുന്നതുൾപ്പെടെ പലതും ഒഴിവാക്കപ്പെട്ടു. പുതുതായി അനുവദിക്കപ്പെട്ട ഫണ്ട് സാങ്കേതിക നടപടികൾ പൂർത്തിയാക്കി ഇതുവരേയും ലഭിക്കാത്തതും നിർമാണപ്രവർത്തനങ്ങൾ വൈകിപ്പിക്കുന്നതിന് കാരണമാണ്