‘ഇത് രാസലഹരികൾക്കെതിരായ യുദ്ധം’; ‘എമ്പുരാൻ – യുണൈറ്റ് എഗെയ്ൻസ്റ്റ് ഡ്രഗ്സ്’ ക്യാംപയിൻ ഉദ്ഘാടനം ചെയ്ത് മന്ത്രി എം.ബി രാജേഷ്

ആന്റണി പെരുമ്പാവൂർ നിർമിച്ച് ആശീർവാദ് സിനിമാസിന്റെ ബാനറിൽ മോഹൻലാലിനെ നായകനാക്കി പൃഥ്വിരാജ് സുകുമാരൻ സംവിധാനം ചെയ്യുന്ന ‘എമ്പുരാൻ’ റിലീസിനോടനുബന്ധിച്ച് കേരളത്തിലെ യുവതലമുറയെ നശിപ്പിക്കുന്ന ലഹരിക്കെതിരെ കൈ കോർക്കുകയാണ് ‘എമ്പുരാൻ’ സിനിമയുടെ അണിയറപ്രവർത്തകരും മനോരമ ഓൺലൈനും. ജെയ്ൻ യൂണിവേഴ്സിറ്റിയും ജോയ് ആലൂക്കാസും ഈ ക്യാംപയനിൽ മനോരമ ഓൺലൈനൊപ്പം ചേരുന്നു.

യുവാക്കൾക്കും രക്ഷിതാക്കൾക്കുമായി കോളജ് ക്യാംപസുകളിലും റസിഡൻസ് അസ്സോസിയേഷനുകളിലും ബോധവൽക്കരണ പരിപാടികൾ സംഘടിപ്പിക്കുകയാണ് ഈ ക്യാംപയിന്റെ ലക്‌ഷ്യം. ബോധവൽക്കരണ ക്യാംപയിന്റെ ഉദ്ഘാടനം എക്‌സൈസ് വകുപ്പ് മന്ത്രി എം.ബി. രാജേഷ് നിർവഹിച്ചു. കേരളത്തിലെ യുവതലമുറയെ കീഴടക്കുന്ന മാരകവിപത്തിനെ ചെറുക്കാനുള്ള സർക്കാരിന്റെ ഉദ്യമത്തിൽ എമ്പുരാൻ സിനിമയുടെ അണിയറപ്രവർത്തകരോടൊപ്പം ജെയ്ൻ യൂണിവേഴ്‌സിറ്റിയും മനോരമ ഓൺലൈനും പങ്കാളികളാകുന്നതിൽ സന്തോഷമുണ്ടെന്ന് പരിപാടിയുടെ ഔദ്യോഗിക ലോഗോ റിലീസ് ചെയ്തുകൊണ്ട് മന്ത്രി എം.ബി.രാജേഷ് പറഞ്ഞു.

‘‘മോഹൻലാലിന്റെ പ്രശസ്തമായ ചിത്രം ലൂസിഫർ നിങ്ങളെല്ലാവരും ഓർക്കുന്നുണ്ടാകും . ലൂസിഫറിന്റെ രണ്ടാം ഭാഗം എമ്പുരാൻ മോഹൻലാൽ നായകനായി ഉടൻ തന്നെ പുറത്തിറങ്ങും. എമ്പുരാൻ പുറത്തിറങ്ങുമ്പോൾ അത് എനിക്ക് സന്തോഷമുണ്ടാക്കുന്നതിനു കാരണം മനോരമ ഓൺലൈനും എമ്പുരാന്റെ അണിയറ പ്രവർത്തകരും ചേർന്ന് ‘യുണൈറ്റ് എഗെയ്ൻസ്റ്റ് ഡ്രഗ്സ്’ എന്ന സന്ദേശം പ്രചരിപ്പിച്ചുകൊണ്ടാണ് ചിത്രം റിലീസ് ചെയ്യപ്പെടുന്നത് എന്നുള്ളതാണ്. സിനിമയുടെ റിലീസിനോട് അനുബന്ധിച്ച് കേരളമാകെ ‘യുണൈറ്റ് എഗൈൻസ്റ്റ് ഡ്രഗ്സ്’ എന്ന സന്ദേശം ഉയർത്തിക്കൊണ്ടുള്ള വിപുലമായ ഒരു ക്യാംപയിൻ സംഘടിപ്പിക്കുകയാണ്. ഇന്നത്തെ സാഹചര്യത്തിൽ അത് എത്രമാത്രം പ്രധാനപ്പെട്ടതാണ് എന്ന് പറയേണ്ടതില്ലല്ലോ. കേരളമാകെ കക്ഷി രാഷ്ട്രീയ ജാതിമത ചിന്തകൾക്കെല്ലാം അതീതമായി മാരകമായ രാസലഹരികൾക്കെതിരായ ഒരു യുദ്ധത്തിൽ ഏർപ്പെട്ടിരിക്കുകയാണ്. ലൂസിഫറിൽ മോഹൻലാൽ പറയുന്നതുപോലെ ‘നാർകോട്ടിക്സ് ഈസ് എ ഡേർട്ടി ബിസിനസ്സ്’ എന്ന സന്ദേശം ഈ സിനിമയുടെയും അതിന്റെ റിലീസിനോട് അനുബന്ധിച്ചുള്ള ക്യാംപയിനും നൽകുന്നു എന്നതാണ് ഇതിനെ ശ്രദ്ധേയമാക്കുന്നത്. അതുകൊണ്ടു തന്നെ ഈ ക്യാംപയിന് എക്സൈസ് വകുപ്പുമന്ത്രി എന്ന നിലയിൽ ഞാൻ ആശംസകൾ അറിയിക്കുന്നു,’’ മന്ത്രി എം.ബി. രാജേഷ് പറഞ്ഞു.