പൊന്നാനിയിൽ തെരുവുനായ ആടിനെ കടിച്ചുകൊന്നു

പൊന്നാനി : തെരുവുനായ്‌ക്കളുടെ ആക്രമണത്തിന് അറുതിയാകുന്നില്ല. വീട്ടിൽ മൃഗങ്ങളെ വളർത്താനും കഴിയാത്ത സ്ഥിതിയിലായി കാര്യങ്ങൾ. വീട്ടുവളപ്പിൽ കെട്ടിയിട്ടിരുന്ന ആടിനെ കൂട്ടത്തോടെയെത്തിയ നായ്‌ക്കൾ കടിച്ചുകൊന്നതാണ് ഒടുവിലത്തെ സംഭവം. കോട്ടത്തറ പള്ളിക്കു സമീപത്തെ മാരാത്ത് രാജേഷിന്റെ വീട്ടിലെ ആടിനെയാണ് തെരുവുനായ്‌ക്കൾ കടിച്ചുകൊന്നത്. തെരുവുനായ്‌ക്കളുടെ ആക്രമണത്തിൽ രണ്ടാഴ്‌ച മുൻപും രാജേഷിന്റെ വീട്ടിലെ ഒരു ആട് ചത്തിരുന്നു. ബുധനാഴ്‌ച വൈകീട്ട് മൂന്നരയോടെയാണ് സംഭവം. ആടിന്റെ കരച്ചിൽകേട്ട് വീട്ടുകാരെത്തിയെങ്കിലും കഴുത്തിൽ കടിയേറ്റതിനാൽ ആട് തത്‌ക്ഷണം ചത്തു. ഈ ഭാഗത്ത് തെരുവുനായ്‌ക്കളുടെ ശല്യം രൂക്ഷമാണെന്നാണ് നാട്ടുകാർ പറയുന്നത്. നഗരസഭാധികൃതരെ വിവരമറിയിച്ചിട്ടും നടപടിയില്ല. കുട്ടികൾക്കുപിന്നാലെയും നായ്‌ക്കൾ ഓടുന്നതിനാൽ രക്ഷിതാക്കളും ഏറ ഭീതിയിലാണ്.