“ഡോറ ഡോറ ഡോറയുടെ പ്രയാണം” തൃശ്ശൂരിൽ നാലാം ക്ലാസ്സുകാർ ഡോറ ബുജി അനുകരിച്ച് നാടുകാണാൻ ഇറങ്ങി . വീട്ടിലെത്തിച്ചത് ഓട്ടോറിക്ഷ ഡ്രൈവർ !
തൃശൂർ: കാർട്ടൂൺ ചാനലിലെ ഡോറ-ബുജിയെ അനുകരിച്ച് നാടുകാണാനിറങ്ങിയ നാലാംക്ലാസുകാരെ വീട്ടിലെത്തിച്ച് ഓട്ടോ ഡ്രൈവർ. ബുധനാഴ്ച വൈകീട്ട് ആമ്പല്ലൂരിലാണ് സംഭവം. സ്കൂൾ വിട്ടശേഷം രണ്ട് കൂട്ടുകാർ ചേർന്ന് നാടുകാണാൻ ഇറങ്ങുകയായിരുന്നു. സ്വകാര്യ ബസിൽ കയറിയ ഇരുവരും കറങ്ങിത്തിരിഞ്ഞ് ഒടുവിൽ ആമ്പല്ലൂരിലെത്തി.
എന്നാൽ ഇവിടെ എത്തിയപ്പോഴേക്കും കൈയില്‍ കരുതിയ കാശ് തീർന്നിരുന്നു. അളഗപ്പ പോളിടെക്നിക്കിന് സമീപത്തെ ഓട്ടോ സ്റ്റാൻഡിൽ എത്തിയ ഇരുവരും കോക്കാടൻ ജെയ്സന്റെ ഓട്ടോറിക്ഷയിൽ കയറി, സമീപത്തെ കല്യാണവീട്ടിലേക്ക് പോകണമെന്നും കൈയിൽ പണമില്ലെന്നും പറഞ്ഞു. സാരമില്ല, കൊണ്ടുചെന്നാക്കാമെന്നായി ജെയ്സൺ.
എന്നാൽ കുട്ടികളുടെ പെരുമാറ്റത്തില്‍ സംശയം തോന്നിയ ജെയ്സൺ സ്കൂൾ ഐ.ഡി. കാർഡിലെ ഫോൺ നമ്പറിൽ വിളിച്ച് വിവരം പറഞ്ഞു. തുടർന്ന് ജെയ്സൺ തന്നെ കുട്ടികളെ രക്ഷിതാക്കൾക്കരികിലെത്തിച്ചു. ഈ സമയം കുട്ടികളെ കാണാതെ രക്ഷിതാക്കൾ സ്കൂളിലെത്തിയിരുന്നു
